ÁBÝ-DABI, 2019 jylǵy 19 maýsym - Qazaqstannyń Birikken Arab Ámirlikterindegi Elshiliginiń jáne Qazaqstannyń Syrtqy saýda palatasynyń birlesken kúsh-jigeriniń arqasynda 2019 jylǵy maýsymda «Optograd» qazaqstandyq kompanııasy Parsy shyǵanaǵy elderiniń barlyq aýmaǵynda keńinen usynylǵan BAÁ-degi «LuLu» gıpermarketteriniń iri kóterme-bólshek saýda jelisiniń sórelerine qazaqstandyq qoı etin eki ret jetkizýdi júzege asyrdy.
«Optograd» kompanııasynyń dırektory Almat Berdenovtyń aıtýynsha, shetelde saýda jasaý árqashan belgili bir táýekelge ıe, alaıda Ámirlikterdiń naryǵy sapaly azyq-túlik ónimderine baǵa men satyp alý suranysy esebinen tartymdy. «Árıne, kúmánym boldy. Eń aldymen, kóptegen ámirlik satyp alýshylar aldyn ala tólemsiz jumys isteıdi. Bizdiń keıbir jabdyqtaýshylarymyz osy sebepti jetkizilimderdi jasaýǵa bel býmaǵan», - dedi qazaqstandyq kásipker.
Aǵymdaǵy jyldyń sáýir aıynyń sońynda qazaqstandyq dıplomattardyń qoldaýymen Ábý-Dabıde qazaqstandyq bıznesmenderdiń Saýda mıssııasy uıymdastyryldy. «Sol kezde bizdiń elimizdiń BAÁ-degi Elshisi Madııar Meńilbekov maǵan qajetti sátte keńes berip, sheshim qabyldadym. Shyn máninde, barlyǵy óz jumysyn jasady: Syrtqy saýda palatasy kásipkerlerdiń saparyn uıymdastyryp, Elshilik qajetti jáne bedeli joǵary isker toptardy shaqyrdy. Al men óz kezeginde kásipker retinde qurylǵan bıznes múmkindikterdi paıdalana aldym», - dedi A. Berdenov.
Qazaqstandyq eksportty ilgeriletýge járdemdesý Qazaqstannyń syrtqy saıası vedomstvosynyń mańyzdy basymdyqtarynyń biri. «Ekonomıkalyq dıplomatııany júzege asyrý aıasynda Qazaqstannyń shet elderdegi mekemeleriniń jumysyndaǵy mańyzdy mindet qazaqstandyq kásiporyndardyń ónimderin sheteldik naryqtarǵa jyljytý bolyp tabylady. Sondyqtan bizdiń Elshilik emırattyq naryqtyń erekshelikteri men retteý sharttaryn eskere otyryp, azyq-túlik ónimderin qosa alǵanda, qazaqstandyq taýarlardy eksporttaýshylarǵa qoldaý kórsetý jáne dıplomatııalyq kómek kórsetý boıynsha qolda bar áleýetti barynsha arttyrýǵa jáne paıdalanýǵa tyrysady», - dep atap ótti Qazaqstan Elshisi M. Meńillbekov.
Esterińizge sala ketsek, bul sátti saýda mıssııasyn ótkizý qarsańynda M. Meńilbekovtyń BAÁ saýda-ónerkásip palatalary federasııasynyń prezıdenti Mýhammed Tanı Mýrshıd Gannam al-Rýmeısımen, «LuLu Group» iri kompanııasynyń tóraǵasy jáne basqarýshy dırektory Iýsýf Alımen jáne basqa da joǵary ókildermen kezdesýi ótti. Nátıjesinde, mıssııaǵa qatysýshylar tikeleı kelissózder júrgizýge, sondaı-aq BAÁ jaǵdaıynda yntymaqtastyq úshin perspektıvalyq baǵyttardy taldaýǵa múmkindik aldy.
Qazaqstandyq ettiń alǵashqy partııasy emırattyq tutynýshylardyń sórelerinde jatyr. Sondyqtan jaqyn arada eki el arasyndaǵy basqa da tabysty saýda-eksporttyq jobalardyń iske asyrylýy kútilýde.