«Aıbyn» áskerı-patrıottyq jastar jıyny. Lebizder men pikirler

Memlekettik mańyzdy jıyn

Jastar men jasóspirimderdiń áskerı ómirge qyzyǵýshylyǵy jyl­dan-jylǵa artyp keledi. Osy oraıda, «Aıbyn» áskerı-patrıottyq jıyny óskeleń urpaqty otansúıgishtikke tárbıeleýge, olardyń bolashaqta Otan qorǵaýǵa ázirlikterin pysyqtaýǵa, jalpy, áskerı salanyń tártibi men jınaqylyǵyna beıimdeýge zor yq­palyn tıgizedi.

Elimizdiń egemendigi, ishki turaqty­lyǵy bolashaqta osy órimdeı jastarǵa senip tapsyrylady. Otan qorǵaý – naǵyz erdiń isi. 

Men bul iste mektepterde oqyty­latyn alǵashqy áskerı daıyndyq pánderiniń sapasyn arttyrý kerek dep esepteımin. О́ıtkeni qolda bar derekterge qaraǵanda, oqý oryndarynda bul pán qazir saldyr-salaq júr­­gizilýde. Sondyqtan alǵashqy ás­kerı daıyndyqtyń álippesin qyz­met­tik, ómirlik tájirıbesi mol, kezinde joǵa­ry daıarlyqtan ótken eńbek dema­ly­syndaǵy generaldan bastalatyn ofıserlerge tapsyrý qajet dep oılaımyn. Ardagerlerdiń áleýetin paıdalanýdan barlyq taraptar da utylmaıdy. 

Muhtar ALTYNBAEV,

Halyq Qaharmany, Armııa generaly, «Qarýly Kúshterdiń ardagerleri» RQB Ortalyq keńesiniń tóraǵasy

Kún tártibinen túspeıtin másele

«Aıbyn» áskerı-patrıottyq jıy­ny bizdiń jas ulandarǵa meılinshe qajet jáne olardyń rýhyn kóteretin is-shara dep esepteımin. Bul jıyn jyldan-jylǵa joǵary deńgeıde ótýde. Bıyl Memleket basshysy, Qazaq­stan Qarýly Kúshteriniń Joǵarǵy Bas qol­bas­shysy Qasym-Jomart Toqaev­tyń arnaıy qatysýy atalǵan sharanyń mańyzyn arttyra tústi. Búgin sapta turǵan jas sarbazdar – erteńgi Otan qorǵaýshylar. Sondyqtan da Memleket basshysynyń aıtqan sózderin jastar qulaqtaryna quıyp ósip, erteńgi kúni naǵyz erjúrek jaýyngerlerge aınalaryna kámil senemin.

Jalpy, bıylǵy «Aıbyn» Elbasy jarııa­laǵan Jastar jylynyń eń ma­ńyzdy sharalarynyń biri dep esepteımin. Halqymyzdyń jadyndaǵy «Erim deıtin el bol­masa, elim deıtin er qaıdan bolsyn» degen qanatty sóz osyndaıdan týsa kerek.

Áskerı qatal tártipti, adaldyqty, joldas­tyq sezimdi osyndaı is-shara­lar­dan boıyna sińirip ósken urpaq ómirlik jolynda qandaı da bolsyn qıyndyqtardy ońaı eńseredi. Sondyq­tan da, «Aıbyn» – ulttyń qamy, bola­shaqtyń baıandy bolýynyń kepili.

Baqtııar MÁKEN,

Májilis depýtaty, «Bolashaq» qaýymdastyǵy keńesiniń tóraǵasy

Erteńimiz – jastarmen

Ul tárbıeleı otyryp, jer ıesin tárbıeleımiz. Qyz tárbıeleı otyryp, ultty tárbıeleıtinimiz anyq. Jastardy rýhanı kemeldendirý, fızıkalyq turǵyda, patrıottyq rýhta tárbıeleý – ulttyq qundylyqtardyń, ult saýlyǵynyń, kemel keleshektiń kepili bolmaq.

Al jaqsy dástúrge aınalǵan «Aıbyn» áskerı-patrıottyq jıynyna Qaraǵandy polıtehnıkalyq kol­ledjiniń «Búrkit» áskerı-patrıot­tyq klýbynan 15 ulan qatysyp jatyr. Bul klýbtyń tárbıelenýshilerine Ulttyq ulannyń «Ortalyq» óńirlik qolbasshylyǵy qamqorlyq kórsetedi.

Oraıy kelgende aıta ketelik, el qor­ǵany bolýǵa qabiletti urpaq qa­lyp­tastyrý maqsatynda 2002 jyly ásker basshylyǵynyń qoldaýymen orta mektepterde «Jas búrkit» kadet qozǵalysy qurylǵan edi. Daryndy da ozat oqýshylardan jasaqtalǵan kadet synyptarynda, mine, 17 jyldan beri áskerı-patrıottyq tárbıe jumysy jemisti júrgizilip keledi. Jalpy, eli­niń taǵdyryna beıjaı qaramaıtyn iz­basarlar, jer qorǵany bolar jaýyngerler daıyndaýda Ulttyq ulan óskeleń urpaqqa árdaıym qoldaý kórsetedi.

Qanat BELIаKOV,

polkovnık, Ulttyq ulan «Ortalyq» óńirlik qolbasshylyǵy qolbasshysynyń orynbasary

Tárbıeniń biregeı alańy

Dástúrge aınalǵan «Aıbyn» ás­kerı-pat­rıottyq jıynynyń ashylýy­na Prezıdenttiń qatysýy Qaraǵandy jurt­shylyǵyn qýantty. Bul – jastardy Otanymyzdyń qorǵaýshysy bolýǵa shaqyratyn biregeı alań. Sol sebepti, osyndaı is-sharaǵa nazar aýdarý jas­tarymyzdy jigerlendirip, olarǵa kúsh beredi. Memleket basshysy ózi aıtyp ketkendeı, bizdiń erteńimiz – jastardyń qolynda.

Búgingi jastar óte alǵyr, jalyndy. Olar qoǵamnyń damýyna já­ne jań­ǵyrýyna septigin tıgizýde. Sol sebep­ti jastardyń boıynda otan­shyl­dyq rýhty qalyptastyryp, tár­bıe­leýge aı­ryqsha kóńil bólingeni bar­lyǵymyz úshin qýanatyn jaıt. Búginde jastar mem­l­eket basqarý isine de aralasyp ja­tyr. Q.Toqaev ant berý rásiminde aıtyp ketkendeı, Prezıdenttik kadrlyq rezerv­tiń qurylýy olardyń kóńiline medet berip, keleshekke senimdi qadam basýǵa ıtermeleıdi.

Al osyndaı is-sharalar  arqyly jas­tar­ǵa otanshyldyqty, patrıottyqty úıretemiz. Otanymyz – basty baılyǵy­myz. Ony qorǵaý – ár azamattyń mindeti. Sondyqtan bul qundylyqty jastardyń boıyna erte bastan sińirý kerek.

Qadısha OSPANOVA,

«Nur Otan» partııasy Qaraǵandy oblysy fılıaly tóraǵasynyń birinshi orynbasary

Áskerdiń biz úshin máni joǵary

Shynynda da, jelkildep ósip kele jatqan jastarsyz el bolasha­ǵyn kóz aldyńa elestetý tipti de múm­kin emes. Qasym-Jomart Toqaev Tuńǵysh Pre­­zı­dentimiz jarııalaǵan Jastar jyly bastamasyn baıandy etýdiń bar­lyq joldaryn qarastyryp, óziniń baǵ­dar­lamasynda aıtylǵan «Sabaqtastyq» ustanymyna aıryqsha mańyz berip otyr. Iá, búgingi jastyń senimine bas­tar joldy izgi nıet, qamqor peıilmen jasalǵan uly ister ǵana tabady. Iаǵnı, memleket jas urpaqtyń máselesine shynaıy túrde moıyn burmaıynsha, kúni erteńgi myzǵymastyq týraly shal­qyp sóıleý úlken ábestik bolar edi. Son­dyqtan Memleket basshysynyń «Qazaq­standy bolashaqqa bastaıtyn – jastar», deýi erteńgini adaspaı boljaǵan esti sóz. Kúni keshe Qaraǵandy oblysyna jumys saparymen kelip, «Aıbyn» respýblıkalyq áskerı-patrıottyq jastar jıynyna qatysqan Qasym-Jomart Toqaev «Biz táýelsiz elimizdiń búgingi jastaryna árqashan zor úmit artamyz, senemiz», dedi. Al ózine úl­ken úmit artylyp, senim bildirilge­nin sezin­gen alǵadaı jastarymyzdyń uıatqa qal­dyrmasy aıdan anyq.  

Dýman ÁBDIRAMANOV,

«Kazsınk» JShS ashyq taý-ken jumystary boıynsha bas kenshi, Qaraǵandy oblystyq máslıhatynyń depýtaty