Alqaly jıynǵa azamattyq qoǵam, memlekettik organdar men salalyq mınıstrlikter ókilderi, qoǵam qaıratkerleri, ekonomıkalyq, saıası, áleýmettik baǵyttaǵy sarapshylar qatysty. Olar Qazaqstannyń aldaǵy damý baǵyty týraly jan-jaqty pikirlerin ortaǵa salyp, Memleket basshysy naqtylap bergen 10 negizgi baǵyt tóńireginde áńgime órbitti.
Aldymen sóz alǵan Qazaqstan strategııalyq zertteýler ınstıtýtynyń dırektory Zarema Sháýkenova jaqynda ótken Prezıdent saılaýy el tarıhyndaǵy jaýapty kezeń bolǵanyn aıtyp, Memleket basshysy Qasym-Jomart Toqaev ulyqtaý rásiminde atap kórsetken mańyzdy baǵyttarǵa toqtaldy. Olar – halyqtyń tabysyn arttyrý, sybaılas jemqorlyqty joıý, sot jáne quqyq qorǵaý júıesin reformalaý, jańa jumys oryndaryn ashý, turǵyn úı máselesin sheshý, ádiletti áleýmettik saıasat, óńirlerdi damytýdyń jańa baǵyty, rýhanı damýdy qoldaý, syrtqy saıasat jáne jastarǵa qoldaý kórsetý.
«Qazirgi tańda Qazaqstannyń úshinshi jańǵyrýy baǵytyndaǵy is-sharalar jalǵasyn tabýda. Prezıdent belgilep bergen mindetterge sáıkes, qazirdiń ózinde birqatar tapsyrma naqtylanyp, jańa ınstıtýttar qurylýda jáne kadrlyq taǵaıyndaýlar júrip jatyr. Sonyń biri – memleket pen qoǵamnyń ózara qarym-qatynasyn belsendi damytýdy, kommýnıkasııanyń tıimdi arnalaryn qalyptastyrýdy kózdeıtin Ulttyq qoǵamdyq senim keńesi. Basqa álem elderi sııaqty Qazaqstannyń da aldynda áleýmettik-ekonomıkalyq jáne qoǵamdyq-saıası ómirdiń barlyq jaqtaryn tez ózgeretin jaǵdaılarǵa beıimdeý, sapaly jańartý mindeti tur», dedi QSZI dırektory.
Budan keıin Syrtqy ister mınıstrligi Halyqaralyq aqparat komıtetiniń tóraǵasy Tımýr Shaımergenov elimizdiń jańa tarıhı kezeńge qadam basqanyn aıta kelip, el dıplomattary shetelderden ınvestısııa tartý baǵytynda belsendi jumys júrgizip jatqanyn málimdedi.
«Búginde mınıstrliktiń shet memlekettermen ekonomıkalyq baılanystardy ilgeriletý jónindegi jumystarynyń júıesi edáýir ózgerdi. Ár aımaqta «Qazaqınvest» kompanııasynyń fılıaldary ashylyp, ol kompanııanyń aımaqtaǵy basshylary sol óńirlerdiń ákimderiniń keńesshilerine aınaldy deýge bolady. Bul kez kelgen ınvestordyń jergilikti bılikpen tikeleı jumys júrgizýine jaǵdaı jasalǵanyn kórsetedi. Syrtqy ister mınıstrligine qarasty barlyq qazaqstandyq mekemeler sheteldik kapıtalmen jumys atqarýǵa barynsha kóńil bólip otyr. Ár dıplomat, ár elshi, ár mınıstr orynbasarlarynyń aldyna jańa mindetter qoıyldy. Olardyń bıznes baǵytyndaǵy jumysyna baǵa bererde júktelgen mindettiń qanshalyqty oryndalǵany esepke alynady. Iаǵnı, qansha is-shara uıymdastyrdy, onyń nátıjesi, tıimdiligi qandaı boldy – bári qadaǵalanady. Jalpy elge tartylǵan ınvestısııanyń qarapaıym halyqqa paıdasy tıetindeı jumystar qolǵa alynyp jatyr», dedi T.Shaımergenov.
Al Aqparat jáne qoǵamdyq damý vıse-mınıstri Juldyz Omarbekova óz sózinde Prezıdent belgilep bergen 10 mańyzdy baǵyttyń ishindegi jastardy qoldaý máselesine keńinen toqtaldy. Ol aldaǵy reformalardyń, ózgergen qoǵamnyń qozǵaýshy kúshi jastar ekenin, olardyń ádiletti, ashyq azamattyq qoǵam qalyptastyrýǵa belsendi aralasýyna barynsha múmkindik berý keregin aıtty. Bul rette vıse-mınıstr «Serpin», «Jasyl el», «Dıplommen – aýylǵa!» sııaqty baǵdarlamalar óz jemisin bere bastaǵanyn, biraq bul jobalardyń ıgiligin áli jastar tolyq sezine almaı otyrǵanyn atap ótti. Sondyqtan da ol baǵdarlamalardyń nátıjesine, tıimdiligine basa mán berý kerek degen pikirde.
«Kásipqor» holdıngi» KEAQ basqarma tóraǵasynyń orynbasary Ásııa Bımendına bıylǵy Prezıdent saılaýy el tarıhyndaǵy mańyzdy oqıǵalardyń biri bolǵanyn, ulyqtaý rásiminde Qasym-Jomart Toqaev naqtylaǵan 10 baǵyt Elbasy júrgizgen saıasat sabaqtastyǵynyń kórinisi ekenin aıtty.
«Búginge deıin jaqsy nátıjesin kórsetip úlgergen baǵdarlamalardyń jalǵasyn tabýy qýantady. Al bıyl Jastar jyly aıasynda «Jastar – el tiregi» men «Jas maman» baǵdarlamalary qolǵa alynyp jatyr. Bilikti maman ómirde óz ornyn ońaı tappaq. Jastardyń myqty maman bolyp qalyptasýy – mańyzdy. Sondaı-aq áleýmettik sala da elimizdegi sheshimin tappaǵan máseleler qatarynda. Bul sala jańarýdy áli de qajet etedi. Halyqtyń jaǵdaıyn jasaý arqyly memleketimizdiń keleshegin jarqyn ete alamyz. О́z armanymyzǵa jetý úshin eń aldymen bilim, halyqtyń jaǵdaıy, beıbitshilik pen birlik bolýy kerek», dedi Á.Bımendına.
Sonymen qatar Memlekettik basqarý akademııasynyń aqparattyq tehnologııalardy damytý jónindegi vıse-rektory Álııa Muhamedjanova jemqorlyqqa qarsy reformalar toptamasyn «Sıfrly Qazaqstan» baǵdarlamasymen ushtastyrý kerek ekenin aıtty.
«Prezıdent ataǵan 10 baǵyttyń birine erekshe toqtalǵym keledi. Búginde ǵasyr indetine aınalǵan sybaılas jemqorlyq máselesiniń Prezıdent baǵdarlamasynan oryn alǵany óte durys. Jáne de sybaılas jemqorlyqqa qarsy kúres «Sıfrly Qazaqstan» baǵdarlamasymen ushtastyrylýy kerek dep oılaımyn. О́ıtkeni Estonııa, Grýzııa sııaqty birneshe memlekettiń tájirıbesin zertteıtin bolsaq, jemqorlyqty eńseretin birden-bir faktor – deldaldardyń bolmaýy ekenin kóre alamyz. Elektrondy úkimettiń damýy, onlaın-qyzmetter men úzdik telekommýnıkasııalyq qurylǵylar, adam kapıtaly – osynyń barlyǵy «Sıfrly Qazaqstan» baǵdarlamasyna keń aýqymda engizilip qoıǵan. Osy eki baǵdarlamany úndestirsek, naǵyz sınergııalyq nátıjege qol jetkizerimiz anyq. Buǵan qosa, elimizdiń eń talantty, jańashyl jastarynan quralatyn rezervten kúterimiz kóp. Bul Japonııa, AQSh syndy damyǵan elderdiń tájirıbesinde bolǵan. Degenmen olardyń oń, teris tustaryna erekshe nazar aýdaryp, osyǵan deıin qurylǵan «A» kadrlyq rezervin jasaqtaý tájirıbesindegi qatelikterdi esepke alǵanymyz jón», dedi Á.Muhamedjanova.
Memlekettik basqarý akademııasynyń strategııalyq damý, zertteý jumysy jáne halyqaralyq áriptestik jónindegi vıse-rektory, ekonomıka ǵylymdarynyń doktory Aıgúl Kósherbaeva 10 negizgi baǵyttyń «Qýatty aımaqtar – qýatty Qazaqstan» baǵytyna qatysty pikirin bildirdi. «Ekonomıst retinde aımaqtardyń damýyna nazar aýdarǵan durys sheshim dep oılaımyn. Aımaqtardy zertteı kele, Nur-Sultan, Almaty, Atyraý qalalarynyń basqalardan ilgeri ekenin baıqadyq. Sondyqtan basqa aımaqtarǵa da ınvestısııa tartylýy qajet. Ol úshin arnaıy zertteýler júrgizip, ár aımaqtyń myqty tustaryn tabý kerek. Osyǵan saı ınvestısııa tartylsa, aımaqtardaǵy turmys ta túzelmek. Investısııa men ómir sapasy bir-birimen baılanysty faktorlar», dedi A.Kósherbaeva.
Jalpy, bul basqosýǵa qatysýshylar el damýyn jańa deńgeıge kóteretin Prezıdenttiń 10 negizgi baǵyty týraly qyzý pikir almasyp, onyń basym bóligi áleýmettik máselelerge negizdelgenin nazarǵa aldy.
Orynbek О́TEMURAT,
Svetlana ǴALYMJANQYZY,
«Egemen Qazaqstan»