Jıyn barysynda mınıstr birneshe kún buryn Qazaqstan dárigerleri ózderiniń kásibı merekesi – Medısına qyzmetkerleri kúnin atap ótkenin tilge tıek etti.
«El Prezıdenti Qasym-Jomart Toqaev medısına qyzmetkerlerin quttyqtap, dárigerlerdiń eńbegi adamdarǵa belsendi qyzmetke, kóbinese ómirge oralýǵa múmkindik beretinin jetkizdi. Sońǵy 3 jylda elimizde negizgi medısınalyq-demografııalyq kórsetkishterdi jaqsartýdyń oń dınamıkasy baıqalady. Olardyń ishinde ómir súrý uzaqtyǵy 0, 85 jasqa ulǵaıdy, jalpy ólim 3 %-dan asa tómendedi, ana ólimi 9 %-ǵa tómendedi, náreste ólimi 6,5%-ǵa azaıdy, týberkýlezden bolatyn ólim 30 %-ǵa tómendedi. Jalpy, bizdiń 2018 jyldaǵy jumystarymyz Elbasy Nursultan Nazarbaevtyń joldaýlarynda berilgen tapsyrmalar negizinde jáne Úkimet basshysynyń tapsyrmalary boıynsha atqaryldy. Onyń birinshisi, Áleýmettik medısınalyq saqtandyrýdy engizý boıynsha daıyndyq jumystary. Sonymen qatar bizdiń saladaǵy medısınalyq kómektiń qoljetimdiligi jáne sapasyn kóterý boıynsha máselelerdi sheshý qolǵa alyndy. Árıne bizdiń aldymyzǵa qoıǵan taǵy bir maqsat – dári-dármekpen qamtamasyz etýdi jaqsartý jáne densaýlyq saqtaý salasyndaǵy sıfrlandyrý jumystary. Bul eń úlken strategııalyq maqsattar dep aıtýǵa bolady. Birinshi baǵyt boıynsha jalpy halyqtyń densaýlyǵyn nyǵaıtýǵa baǵyttalǵan arnaıy sharalar engizildi. Elbasynyń tapsyrmasyna sáıkes qoǵamdyq densaýlyqty basqarý boıynsha sharalar jospary qabyldanyp, mektep oqýshylarynyń densaýlyǵyn qorǵaý jónindegi jańa standarttar engizildi. Tolyqtaı alǵanda, 12 mıllıonnan astam adam salamatty ómir saltyn qalyptastyrý sharalaryna tartyldy. Vaksınasııa halyqtyń densaýlyǵyn nyǵaıtýdaǵy mańyzdy sharalardyń biri sanalady. Elimizde vaksınasııa alýǵa tıisti halyqtyń 97%-yna ekpe júrgizildi. Bul Dúnıejúzilik densaýlyq saqtaý uıymynyń usynysyna saı keledi», dedi E.Birtanov.
Onyń aıtýynsha, elimizde halyqtyń densaýlyǵyn nyǵaıtý maqsatynda ulttyq skrınıngtik baǵdarlama júrgizilip jatyr. Ol eresek turǵyndar men balalardy jedel zertteýdiń 7 túrin qamtıdy. Bıyl 7 mıllıonnan astam adamdy qamtıtyn 12 mıllıonnan astam tekserý júrgizildi. 304 myńǵa jýyq aýrý anyqtalyp, shamamen 260 myń adam esepke alynǵan.
Sonymen qatar mınıstr medısınalyq-sanıtarııalyq alǵashqy kómektiń sapasyn jaqsartý boıynsha birqatar jumys júrgizilip jatqanyn tilge tıek etti.
«Medısınalyq-sanıtarııalyq alǵashqy kómekti damytý boıynsha sharalar jospary qabyldandy. Elimiz boıynsha jalpy praktıkalyq dárigerdiń myńnan astam, pedıatrııalyq dárigerlerdiń 79 jańa ýchaskesi ashyldy. Dárigerge qaralýǵa jáne dárigerdi shaqyrýǵa onlaın jazylý engizildi. Osylaısha, 2018 jyly jalpy praktıkadaǵy dárigerlerge túsetin salmaq 5%-ǵa azaıyp, emhanalarda kezekke túsý eki esege azaıdy», dedi E.Birtanov.
Baıandama barysynda mınıstr Qazaqstanda buryn-sońdy álem elderinde bolmaǵan tolyqtaı jasandy júrek otasy 3 adamǵa jasalǵanyn jetkizdi.
«Osy rette, ótken úsh jyldyń ishinde joǵary tehnologııalyq qyzmetterdiń sany, sonyń ishinde biregeı operasııalardyń úlesi artyp keledi», dedi mınıstr.
Onyń aıtýynsha, elimizdiń Ulttyq kardıohırýrgııalyq ortalyqta ótken jyly júrek transplantasııasy boıynsha 8 ota jasalǵan.
Densaýlyq salasyna qatysty osy jáne ózge de mańyzdy máselelerdi qozǵaǵan vedomstvo basshysy mınıstrliktiń qoǵammen barynsha ashyq aqparat almasýdy alǵa qoıǵanyn atap ótti.
«Biz baılanys úshin ashyqpyz, Sizder bizge barlyq múmkin baılanys arnalary, áleýmettik jeli arqyly habarlasa alasyzdar, meniń nemese orynbasarlarymnyń jeke qabyldaýyna kelýge múmkindikterińiz bar. Bizdiń kezdesý densaýlyq saqtaý salasynyń barlyq aspektileri boıynsha ashyq jáne ózara mańyzdy pikir almasýǵa jaqsy múmkindik beretinine senimdimin. Osy kezdesýdi paıdalana otyryp, barshańyzdyń denderińizge saýlyq, otbastaryńyzǵa amandyq tileımin», dedi E.Birtanov.
Raýan QAIDAR,
«Egemen Qazaqstan»