Til – ortaq, tilek – bir

Mádenıet jáne sport mı­nıstr­­liginiń Til saıasaty komı­teti jáne «Shaısultan Shaıahmetov atyn­daǵy «Til-Qazyna» ulttyq ǵylymı-praktıkalyq ortalyǵy» kommersııalyq emes aksıonerlik qoǵamy uıymdastyrǵan dástúrli baıqaýǵa bıyl 120 avtordan 250-ge jýyq materıal qabyldanǵan. Tórt atalym boıynsha synǵa túsken aıtýly dodada barsha árip­tesimiz ana tilimizdiń búgini men bolashaǵy, erteńi haqynda úlken máselelerdi qozǵap, qa­lamdy tereńnen terbedi.

Igi sharanyń shymyldyǵyn ashqan Mádenıet jáne sport mınıstri Aqtoty Rahmetol­l­a­qyzy óz kezeginde búginde aq­parat aǵyny tasqyndap turǵan asa jaýapty kezeńde elimizdiń aınasy bolyp tabylatyn jýrnalıster qaýymynyń orny erekshe ekenin atap ótti.

– Kez kelgen aqparat eń aldymen ult múddesine, urpaq bolashaǵyna, memleketimizdiń qaýipsizdigine tikeleı yqpal etedi. Tórtinshi bılik ókilderin osy turǵyda elimizdi aqparat keńistiginde únemi qoldap kele jatqany úshin alǵys bildiremiz. Alda da bizben birge aýqymdy, kúrdeli máselelerde birigip jumys isteýge shaqyramyz», –dedi mınıstr.

Baıqaýǵa usynylǵan materıaldardy elimizge belgili jýr­nalısterden quralǵan arnaı komıssııa qarap, baǵalaǵan. Baıqaý qorytyndysy boıynsha «Úzdik maqala» atalymynyń birinshi orny «Ognı Alataý» gazetiniń bas redaktory Atsalım Idıgovqa berilse, «Úzdik radıobaǵ­dar­­­lama» atalymy boıynsha birin­shi oryndy «Shalqar» radıo­synan áriptesimiz Gúlbaný Muhtarqulova ıelendi.

 Al, «Úzdik telebaǵdarlama» atalymy boıynsha birinshi oryn «Qazaqstan» ulttyq ar­na­­­­­synyń jýrnalısi Nartaı Sársenǵalıevqa buıyrsa, «Úzdik saıt maqalasy» atalymy boıynsha birinshi orynǵa «Qamshy.kz» portalynyń jýrnalısi Berik Beısenuly laıyq dep tanyldy.

Eń negizgi júlde, ıaǵnı «Mem­­lekettik til jáne BAQ» baı­qaýynyń bas júldesi ózi­mizdiń «Egemen Qazaqstan» gazetiniń sholýshysy qalam ustaǵan kún­nen ultymyzdyń joǵyn joq­tap, qazaq tiliniń qamyn jep kele jatqan Beken Qaıratulyna buıyrdy. Áriptesimiz ózi de aıtyp ótkendeı, báıge degen bir adamnyń ǵana emes, búkil ujymnyń eńbegimen keledi. Bas júlde ıegerine degen bul qoshemet – bas basylymnyń ǵasyr toıyna berilgen baıǵazy dep biletinin jetkizdi.

Aıta ketken jón, júldeger­lerimiz ár atalym boıynsha bi­­­­rin­­­­shi oryn ıegerleri 500 myń teńgeden, al bas júlde ıegeri 1 mln teńge kóleminde syıaqyǵa ıe boldy.

Sondaı-aq shara barysynda 2019 jylǵy mádenıet, sport, týrızm, til salalaryn buqaralyq aqparat quraldarynda jan-jaqty nasıhattaýǵa úles qosqan jýrnalısterge Mádenıet jáne sport mınıstri A.Raıymqulovanyń Alǵys haty tabystaldy. Bul top­tyń ishinde de egemendik tilshi, aqyndarymyzsha aıtsaq «qalamy qazdyń qańqylynan qaımaq jalatatyn» qarymdy jýrnalıst Nazerke Jumabaıdyń aty atalyp, marapat bıiginen tabyldy.

Jalpy jýrnalısterdiń kási­bı merekesi qarsańyndaǵy bıyl­ǵy báıgeler bas basylymǵa bas barmaǵymen baǵa berip jat­qan­daı áserge bóleýde bizdi. Jo­ǵarydaǵy jaqsy jańalyq­ta­ry­myzdy eselep, týra sol kúni Qazaq­stan Jýrnalıster oda­ǵy­nyń syı­lyǵyna taǵy bir árip­tesimiz, atap aıtsaq gazettiń Mań­ǵys­taýdaǵy menshikti tilshisi Gúlaıym Shyntemirqyzy da ıe boldy.

Odaq júldesi 10 jýrnalıske berilgen. Áriptesimiz «Ekono­mıka­lyq sholý» atalymy boıynsha marapattalyp otyr.

Mundaı marapattar qalamǵa shabyt, qadamǵa qarqyn eseleıdi. Qutty bolsyn demekpiz!