– «2018 jyly ekonomıkalyq ósim 4,1 paıyzdy qurap, aldyńǵy jyldyń deńgeıin qaıtalady. Bıylǵy 5 aıdyń qorytyndysy boıynsha jalpy ósý 4 paıyzdy qurady. Mınıstrliktiń bıylǵy alǵa qoıǵan eń mańyzdy úsh baǵyty bar. Olar – eldegi kásipkerlikti damytý, baǵalar men tarıfter jáne óńirlerdi damytý», – dedi R.Dálenov.
Mınıstrdiń aıtýynsha, 2020 jylǵy 1 qańtardan bastap 1 334 aýylda jergilikti ózin ózi basqarý (JО́B) bıýdjetiniń 4-shi deńgeıin engizý josparlanǵan. JО́B bıýdjetiniń basty ereksheligi – jergilikti máselelerdi sheshýge 7,6 mln azamattyń qatysýy.
Elimizdegi óńirlik saıasat halyqtyń turyp jatqan jerine qaramastan básekege qabilettiligi men turmys sapasyn arttyrýǵa baǵyttalǵan. О́ńirlerdi damytý memlekettik baǵdarlamasyn 2020 jylǵa deıin iske asyrýdyń qorytyndysy boıynsha ýrbanızasııa deńgeıi 58 paıyzǵa jetti. Bul 2017 jylmen salystyrǵanda 0,8 paıyzǵa artyq. 2018 jyly qalalarǵa sý tartý 94,5 paıyzǵa, aýyldarǵa sý jetkizý shamamen 60 paıyzǵa ulǵaıdy, – dedi mınıstr óz sózinde.
Jıynda elimiz aýmaǵy arqyly ótetin ınternet-sálemdeme tranzıtin 6 esege ulǵaıtý múmkindigi bar ekendigi aıtyldy.
«Taıaý 5 jyldyń ishinde elektrondy saýda aınalymynyń kólemi 1 trln dollarǵa artýǵa tıis. Biz Eýropa men Qytaı ortasynda – tutynýshy men sálemdemelerdi jóneltýshilerdiń arasynda óte tıimdi jerde ornalasqanbyz. Sondyqtan kólik legin Qazaqstan arqyly jóneltýdiń keleshegi úlken. Ol úshin barlyq ınfraqurylym bar. Mundaı sálemdemelerdi rásimdeý úshin barlyq kedendik túzetýler engizilgen. Biz taıaý jyldary Qazaqstan arqyly ınternet-sálemdeme tranzıtin 6 esege ulǵaıtýǵa bolady dep esepteımiz», dedi mınıstr.
Mınıstrdiń aıtýynsha, onlaın-saýdany yntalandyrý úshin ınternette elektrondy ádis arqyly saýda jasaıtyndarǵa tabys salyǵy men korporatıvtik tabys salyǵy birneshe jylǵa alynyp tastalǵan. Eksportqa arnalǵan taýarlardy deklarasııalaý da jeńildetilgen. Aldaǵy ýaqytta ınternet arqyly satyp alynatyn poshta qujattary nemese sálemdemeler kóterme rásimdelýi múmkin. Endi poshta qujattary deklarasııa retinde tanylady. Elektrondy saýda óte qarqyndy damyp keledi jáne barynsha tıimdi sektor sanalady, – dedi R.Dálenov.
Mınıstrliktiń málimetinshe, elimizde tutynýshylardyń quqyǵyn qorǵaý ınstıtýty kúsheıtilýde. Elektrondy saýdadaǵy satyp alýshy kádimgi saýdadaǵydaı qorǵalady. Sonyń nátıjesinde byltyr onyń bólshek saýdadaǵy úlesi 1,9-dan 2,9 paıyzǵa nemese 92 mlrd teńgege ulǵaıypty.
Osy jıynnan keıin Ortalyq kommýnıkasııalar qyzmetinde baspasóz konferensııasy ótti. Ulttyq ekonomıka mınıstri baspasóz máslıhatynda aýyldardy damytýǵa qatysty «Dıplommen aýylǵa!» baǵdarlamasyna degen suranys jyl saıyn artyp kele jatqandyǵyn málimdedi.
Bizdiń mınıstrlik «Dıplommen aýylǵa!» baǵdarlamasynyń ákimshisi bolyp tabylady. Jyl saıyn osy baǵdarlama arqyly 5 myń azamat kómek alady, dedi mınıstr.
R.Dálenovtiń aıtýynsha, baǵdarlamaǵa qatysýǵa ótinish jıi kelip jatyr. Soǵan sáıkes, bıylǵy jyly bıýdjet qarajaty kepilge qoıylyp, 5 myńǵa jýyq adam «Dıplommen aýylǵa!» baǵdarlamasyn paıdalana alady.
Mınıstr aldaǵy halyq sanaǵyna da toqtalyp, naýqanda paıdalanylatyn planshetter mektepterge beriletindigin jetkizdi.
– Halyq sanaǵy kelesi jyly bolady, oǵan jalpy somasy 9 mlrd teńge jumsaý josparlanýda. Eger 10 jyl burynǵy halyq sanaǵymen salystyrar bolsaq, shyǵystar somasy birshama tómen. Negizgi qarajat aqparattyq júıege jáne qural-jabdyqtar men sanaqty ótkizýge qajetti planshetter satyp alýǵa jumsalady. Qaǵaz satyp alynbaıdy. Satyp alynsa da óte az, blankiniń ózi elektrondy túrde bolady, – dedi ol.
Osy rette mınıstr sanaq júrgizýge alynatyn planshetter kimderge beriletinine taǵy da toqtaldy. «Planshetter komıtet (Statıstıka komıteti) jumysyna paıdalanýǵa beriledi. Sonymen qatar olardyń basym bóligi Bilim jáne ǵylym mınıstrligi júıesine, ıaǵnı mektepterge beriledi. Sondyqtan sanaq júrgizýge satyp alynatyn qural-jabdyqtar keıin de kádege jaraıdy», dedi mınıstr.