Keı adamdarda qanaǵat degen joq qoı. Obal-saýapty da bile bermeıdi. Qaryn toıdyrǵannan basqa da isi joq. Balyq ýyldyryq shashar kezde ashyq kólge shyǵyp, paıdaǵa shyqpaq bolǵan Aral aýdanyndaǵy eki azamat zań quryǵyna ilindi. Janýarlar men ósimdikter álemin qorǵaý barysyndaǵy reıd kezinde qolǵa túsken ekeýden 126 keli kókserke tárkilengen.
«Atalǵan derek aýdandyq prokýratýrada tirkeldi. Quzyrly organdar tarapynan eki turǵynǵa QR Qylmystyq kodeksiniń 335-babynyń 3-bóligimen sotqa deıingi tergep-tekserý júrgizildi. Sot úkimimen atalǵan azamattar taǵylǵan aıyptar boıynsha kináli dep tanyldy. Árqaısysyna 6 aı merzimge bas bostandyǵyn shekteý jazasy taǵaıyndaldy», - Qyzylorda oblystyq prokýratýrasy osylaı dep málimdedi.
Endi olardan memleketke keltirilgen 620 392 teńge kólemindegi zalal ózderinen óndiriledi. Zańsyz balyq aýlaýshylar aıyppuldan bólek motorly qaıyǵynan da aıyrylyp tyndy, ıaǵnı tárkilendi.
Qyzylorda oblysy.