Túrkistan oblysynyń Arys qalasynyń turǵyndaryna kómek kórsetý maqsatynda Shyǵys Qazaqstanda arnaıy shtab quryldy. Aımaq basshysynyń ózi jetekshilik etetin shtabtyń quramyna oblys ákiminiń orynbasarlary, «Nur Otan» partııasy oblystyq fılıaly tóraǵasynyń birinshi orynbasary, BAQ jáne qoǵamdyq birlestik ókilderi enip otyr.
Oblys ákimdiginde selektorlyq rejımde ótken brıfıngte Danıal Ahmetov óńir turǵyndaryn, aımaqtaǵy iri kásiporyn basshylary men kásipkerlerdi Arys halqyna qoldan kelgenshe kómek kórsetýge shaqyrdy. «Búgingi jıynǵa memlekettik qyzmetshilermen qatar bıznes ókilderi men jýrnalısterdi de shaqyrdym. Jerlesterimiz arystyqtardyń qaıǵysyna beı-jaı qaramaıdy dep senemin. Kásiporyn basshylary óz ujymdarymen kezdesip, áriptesterin qıyn jaǵdaıǵa dýshar bolǵan aǵaıynǵa járdemdesýge shaqyrýy tıis. Tek májbúrleý degennen aýlaq bolyńyzdar. Barlyq jumys erikti túrde júrgizilýi kerek. Qazir apattan zardap shekken otbasylardyń balalaryn Shyǵys Qazaqstandaǵy lagerlerde demaltý máselesin qarastyrýdamyz», – dedi oblys ákimi.
Qazir Shyǵys Qazaqstanda birneshe jerde gýmanıtarlyq kómek kórsetý pýnktteri ashylyp, jumys istep jatyr. Keshe О́skemende «Nur Otan» partııasy oblystyq fılıalynyń ǵımaratynda (Qasym Qaısenov kóshesi, 121) osyndaı pýnkt ashylǵan bolatyn. Munda gıgıenalyq zattar, konserviler, dándi daqyldar men makaron ónimderi jáne jemis-jıdekter, sý, balalarǵa arnalǵan kıim-keshekter, kórpe jáne kórpeshiler qabyldanady. Atalǵan fılıal tóraǵasynyń orynbasary Oleg Chýgýnkovtyń aıtýynsha, dál qazir pýnktke qala turǵyndarynan kómek qabyldanyp jatyr. Jınalǵan zattar qysqa merzimde Arysqa jóneltiledi. Búgin oblys ortalyǵyndaǵy Halıfa Altaı meshiti «Shyǵys Aryspen birge» qaıyrymdylyq aksııasyn bastady. «Oblystyq meshit pen aýdandyq meshitter ártúrli kómek túrlerin qabyldap, Arys turǵyndaryna jóneltýge ázir» deıdi Qazaqstan Musylmandary Dinı basqarmasy О́skemen óńiri boıynsha ókil ımamy Ermek Muqataı.
Sonymen qatar oblystaǵy barlyq Jastar resýrstyq ortalyqtarynda (olardyń sany – 20) Arys turǵyndaryna gýmanıtarlyq kómek qabyldanyp jatyr. О́skemendegi gýmanıtarlyq kómek kórsetý shtaby Potanın kóshesi, 27/1 mekenjaıynda ornalasqan.
О́SKEMEN
Sýretterdi túsirgen Tileýbek ShAIаHMET