Shyǵys Qazaqstanda 2017 jyldan bastap "Eńbek" nátıjeli jumyspen qamtý men jappaı kásipkerlikti damytý baǵdarlamasy júzege asyrylýda. Oblystyq Jumyspen qamtý jáne áleýmettik baǵdarlamalardy úılestirý basqarmasynyń málimetine súıensek, bıyl qonys aýdarý baǵdarlamasy boıynsha óńirge 1566 adamǵa kvota bólinipti. Bul maqsatqa respýblıkalyq bıýdjetten 736 mln.teńge qarjy qarastyrylypty. «Qańtar aıynan beri Shyǵys Qazaqstanǵa 560 astam adam keldi. Túrkistan oblysyndaǵy qaıǵyly oqıǵalarǵa baılanysty biz Arys qalasynan myńdaǵan adamdy qabyldaýǵa daıynbyz. Osy maqsatta oblys ákimdigi qyzmetkerleriniń Arys qalasyna shyǵýy josparlanýda, onda jergilikti turǵyndarǵa 1 528 bos oryn usynylady. Bos oryndar jármeńkeleri, qajetti áńgimelesýler men keńester ótkiziledi. Eger qajettilik bolsa, biz Eńbek jáne áleýmettik qorǵaý mınıstrligine kvota jáne qarjylandyrýdy arttyrý máselesimen júgine alamyz» deıdi oblys ákiminiń orynbasary Ásem Núsipova.
Búgin óńirimizde Túrkistan oblysynyń Arys qalasynyń turǵyndaryna kómek kórsetý maqsatynda arnaıy shtab qurylǵan-dy. Aımaq basshysynyń ózi jetekshilik etetin shtabtyń quramyna oblys ákiminiń orynbasarlary, «Nur Otan» partııasy oblystyq fılıaly tóraǵasynyń birinshi orynbasary, BAQ ókilderi men qoǵamdyq birlestik ókilderi enip otyr. Oblys ákimdiginde selektorlyq rejımde ótken brıfıngte Danıal Ahmetov óńir turǵyndaryn, aımaqtaǵy iri kásiporyn basshylary men kásipkerlerdi Arys halqyna qoldan kelgenshe kómek kórsetýge shaqyrǵan-dy. О́ńirdiń «Kazsınk» JShS, «ÚMZ» AQ, «TMK» AQ, Baqyrshyq taý-ken óndirý kásiporny sekildi iri óndiris oryndary bastamany qoldap, 107 mln. teńge qarjy aýdarypty. Al oblystyń etnomádenı birlestikteri Arys qalasynyń turǵyndaryna kómek kórsetý qoryna 738 myń teńge jiberipti.
О́SKEMEN