Vıse-mınıstr ambýlatorlyq jáne stasıonarlyq emdeýge 165 adam jiberilgenin jáne túrli dárejedegi jaraqatpen reanımasııalyq bólimshelerde 15 adam jatqanyn málimdedi. Belgili bolǵandaı, jaraqattanǵan turǵyndardyń kópshiligine Shymkenttegi oblystyq klınıkalyq jáne oblystyq balalar aýrýhanasynda tıisti kómek kórsetilip jatyr. Jaraqat alǵandarǵa kómektesýge Túrkistan oblysyndaǵy ortalyq aýrýhanalar da jumyldyrylypty.
– Medısınalyq kómekti kúsheıtý maqsatynda Arys, Túrkistan, Kentaý jáne Shymkent qalalary men Ordabasy aýdanynan 22 jedel medısınalyq járdem brıgadasy tartylyp otyr. Qosymsha 4 brıgada Jambyl oblysynan jiberildi. Budan bólek taǵy 12 brıgada Jambyl jáne Qyzylorda oblystarynda daıyn tur. Emdelýshilerdi konsýltasııalyq kómekpen qamtý úshin Almaty jáne Shymkentten quramynda reanımatologtar, travmatologtar, balalar reanımatologtary jáne neırohırýrgterden jasaqtalǵan brıgada sanıtarlyq avıasııamen attandy, – deıdi O.Ábishev.
Vedomstvo ókili qazirgi ýaqytta aýyr haldegi barlyq emdelýshige kómek kórsetilgenin, sonymen qosa bir adamǵa ota oqıǵa ornynda jasalǵanyn jetkizdi. Sondaı-aq shuǵyl tasymaldaý boıynsha qıyndyq týdyrmas úshin sanıtarlyq avıasııanyń 2 tikushaǵy ázir ekenin aıtty. Atalǵan áýe tehnıkasy barlyq medısınalyq qondyrǵymen jaraqtalǵanyn naqtylady vıse-mınıstr.
Al Ishki ister mınıstriniń orynbasary Iýrıı Ilın, 25 maýsymdaǵy jaǵdaıǵa sáıkes áskerı bólimsheniń aýmaǵynda jarylys tirkelmegenin atap ótti.
– Ishki ister mınıstrliginiń 1200-den asa adamnan turatyn quramy jáne 180-nen astam tehnıkasy oqıǵa ornynda kezekshilik atqarýda. Uzyn sany 45 órt aýyzdyqtaldy. Onyń ishinde 21 fakti jeke turǵyn úıdiń aýmaǵynda bolsa, 9 derek boıynsha sharýashylyq qora-jaılar órtengeni anyqtaldy. Taǵy 15 oqıǵa dalalyq aımaqta snarıadtar men oq-dárilerdiń jaryqshaǵynan paıda bolǵan.
Túrkistan oblystyq ishki ister departamenti jáne respýblıkalyq Ulan sarbazdarynyń kúshimen buzaqylyq árekettiń aldyn alýda kezekshilik uıymdastyryldy. Nátıjesinde ótken táýlikte úsh adam ustaldy. Buzaqylyq boıynsha eki derek tirkeldi. Qazirgi tańda Qorǵanys mınıstrligi ushqyshsyz basqarylatyn apparattardyń kómegimen qaýipti aımaqta barlaý jumystaryn júrgizip jatyr. Oq-dári qoımasynyń aýmaǵynda tutanýy yqtımal 9 oshaq tabylǵan. Demek, jarylystyń qaıtalaný qaýpi áli bar. Biraq alǵashqydaı aýqymdy jarylys bolmaıdy dep senimmen aıtýǵa bolady, – dedi Iý.Ilın.
Ishki ister mınıstriniń orynbasary, qalany jarylmaǵan oq-dárilerden tazartý úshin saperler jumyldyrylǵanyn aıtty. Júz adamnan asatyn ınjenerlik jasaq tıisti temir joldyń boıynda, qalanyń ishinde jáne áskerı bólimsheniń mańynda jumys isteýde.
«Mınadan tazartý jumystary aıaqtalǵannan keıin turǵyndardy úılerine qaıtaramyz. Materıaldyq shyǵyndy esepteıtin komıssııa qurylady. Úkimet basshysy bekitken arnaıy jumys tobynyń basynda Premer-Mınıstrdiń orynbasary Jeńis qasymbek tur. Arnaıy top ákimdiktermen jáne qurylys kompanııalarymen birlesip jeke úıler men ınfraqurylymǵa kelgen materıaldyq zardapty tolyq esepteıdi. Odan keıin qalpyna keltirý jumystary jasalady», dedi vıse-mınıstr.
«Memleket basshysynyń tapsyrmasymen Úkimettiń rezervinen arnaıy qarajat bólinedi», dedi Iý.Ilın. Mınıstr orynbasarynyń aıtýynsha, Memleket basshysy 2-3 kúnde mınadan tazartý jáne qalpyna keltirý jumystaryn aıaqtaýdy tapsyrǵan.
Ishki ister mınıstrligi ókiliniń pikirinshe, jergilikti apattan keıin halyqty evakýasııalaý úshin qoǵamdyq kólikterdi jumyldyrǵan eken. Artynsha jaqyn mańaıdaǵy eldi mekenderden de kólikter aldyrylǵan. Keı azamattar ózderiniń jeke kólikterimen de jerlesterine kómektesken.
Baýyrjan MUQAN, Jaqsylyq MURATQALI, «Egemen Qazaqstan»