Arystaǵy jarylystan qaza tapqan úshinshi adam 32 jastaǵy áskerı qyzmetker bolǵan. Bul týraly QazAqparat habarlady.
Oblystyq Qoǵamdyq densaýlyq basqarmasynyń baspasóz qyzmetiniń habarlaýynsha, kóz jumǵan jigit Ábdikúl Nurlanuly Ahmetov Arys qalasynyń turǵyny. 1987 jyly týǵan. Úılengen, balasy bar.
«Ol sol jerdegi áskerı bólimde jumys istegen. Jarylys bolǵan kezde aýyr jaraqattanyp, avıasııalyq medısınalyq qutqarý qyzmetimen Túrkistan oblystyq klınıkalyq aýrýhanasyna jetkizilgen. Es-tússiz jatqan naýqasqa jansaqtaý bóliminde barlyq qajetti saýyqtyrý sharalary jasaldy. О́kinishke oraı, ol kóz jumdy», dedi baspasóz hatshysy Mıra Súıleımenova.
Sondaı-aq basqarmanyń málimetinshe qazirgi tańda 74 adam aýrýhanalarda em qabyldaýda. Olardyń 4-eýiniń jaǵdaıy aýyr dep baǵalanýda. Aralarynda kishkentaı balalar da bar.