Qumar Irgebaıuly halyqaralyq baıraqty básekelerde el namysyn abyroımen qorǵap júrgen sportshylar men olardyń bapkerlerine erekshe qurmet kórsetip, gramotalar, alǵys hattar men jarty mıllıon teńge kóleminde aqshalaı syıaqylar tabys etti.
Qytaıdyń Sıan qalasynda ótken Azııa chempıonatynda erkin kúres sheberi Nurqoja Qaıpanov altyn júldeni jeńip aldy. 70 keli salmaqta kúresetin balýan aqtyq synda japondyq Kodjıra Shıgýmen kezdesip, 9:0 esebimen jeńiske jetti. 20 jastaǵy sportshy el kúresi tarıhyndaǵy eń jas chempıon atandy.
Soltústikqazaqstandyq velosportshylar úzdik ekendikterin taǵy bir dáleldedi. Jandos Bıjigitov pen Artem Zaharov toptyq jarysta bıik tuǵyrdan kórindi. Olar Tashkent qalasynda ótken dodada aldaryna jan salmady. Natalıa Saıfýtdınova men Mahabbat Úmitjanova kúmis júlde aldy. Alına Sarkýlova toptyq velojarysta «qolaǵa» ıe boldy. Jeńil atletter Margarıta Muqasheva men Mıhaıl Lıtvın júgirýden qola júlde alyp, álem chempıonatynyń normatıvin oryndady.
«О́ńir sportshylary jyl saıyn jeńisterin eselep, jaqsy kórsetkishke qol jetkizip keledi. Demek, sporttyq nysandardyń materıaldyq-tehnıkalyq bazasyn jaqsartý óz nátıjesin berip jatyr degen sóz. Biz bolashaqta da talantty sportshylardyń kásibı turǵydan ósýine barlyq jaǵdaıdy jasaımyz. Kúzde daryndy balalarǵa arnalǵan sport kolledji ashylady. Bul qadam óńirdegi sportty damytýǵa úlken serpilis beredi», dedi Qumar Aqsaqalov.