Bul marapatty buqaralyq aqparat quraldary qyzmetkerleri kúni qarsańynda Aqordada ótken Qazaqstan Prezıdentiniń syılyqtaryn berý, granttaryn tapsyrý jáne alǵystaryn jarııalaýǵa arnalǵan saltanatty shara barysynda Memleket basshysy Qasym-Jomart Toqaev «Egemen Qazaqstan» RG» AQ basqarma tóraǵasy Darhan Qydyrálige tapsyrdy. Osy rásim barysynda el gazeti – «Egemenniń» BAQ salasyna qosqan eleýli úlesi jáne bıyl basylymnyń shyǵa bastaǵanyna 100 jyl tolyp otyrǵany aıryqsha ataldy.
Kúni keshe Memleket basshysy tapsyrmasynyń negizinde Úkimet 28 maýsymdy buqaralyq aqparat quraldary qyzmetkerleri kúni retinde resmı bekitip, qaýly shyǵardy. Bul sheshim elimizdiń áleýmettik-ekonomıkalyq jáne qoǵamdyq-saıası damýyn aqparattyq turǵyda qamtamasyz etý isinde ózindik orny bar jýrnalıster qaýymyna erekshe kózqarastyń belgisi boldy.
Saltanatty is-sharada Memleket basshysy Qasym-Jomart Toqaev jýrnalısterdiń el ómirindegi róline toqtaldy.
– Bolashaqty – saıasatkerler, ótkendi – tarıhshylar, al búgingini jýrnalıster oılaıdy degen qaǵıda bar. Biraq, menińshe, jýrnalıster bolashaqty da, ótkendi de oılaıtyn biregeı qaýym dep aıtýǵa bolady. Halyqqa el ishindegi oqıǵalar jóninde habar taratyp, shuǵyl ári shynaıy aqparat berý – sizderdiń kásibı mindetterińizdiń arqasy, – dedi Memleket basshysy.
Qasym-Jomart Toqaev sonymen qatar jýrnalısterdiń Arys qalasynda bolǵan tótenshe jaǵdaıdy elimizdiń túkpir-túkpirine der kezinde jetkizgenin atap ótti.
– Bul árıne barsha halyqtyń janyna batqan oqıǵa boldy. Osyndaı jaýapty sátte sizder – otandyq BAQ ókilderi búkil Qazaqstan jurtshylyǵy arystyq aǵaıynmen birge ekenin halyqqa joǵary deńgeıde jetkize bildińizder. Barlyq jýrnalısterge alǵysymdy, rızashylyǵymdy bildiremin, – dedi Prezıdent.
Prezıdent ozyq tehnologııa zamanynda medıa salanyń múmkindikteri óte aýqymdy ekenin jetkizdi. Memleket basshysy jýrnalıstıkanyń jańa dáýirinde ǵalamtor jáne áleýmettik jelilerdiń aıryqsha róline toqtalyp, aqparattyń ashyq, jedel jáne qoljetimdi bolýy jetistiktiń basty ólshemderine aınalǵanyn aıtty.
– Memlekettiń áleýetin nyǵaıtý, ekonomıkany damytý, azamattardyń turmys sapasyn arttyrý – búginde elimizdiń aldynda turǵan mańyzdy mindetter. Otandyq medıa-qaýymdastyqtyń syndarly negizde uıysýy, jýrnalısterdiń belsendi azamattyq ustanymy, olardyń kásibı deńgeıi jáne ádildigi – aqparattyq keńistiktegi tabysty jumystyń negizgi sharttary. Memleket óz tarapynan BAQ-qa qoldaý kórsete beredi, – dep atap ótti Qasym-Jomart Toqaev.
Sonymen Memleket basshysynyń О́kimine sáıkes Qazaqstan Prezıdentiniń syılyqtary «Jas О́rken» JShS bas dırektory Júsipbek Qorǵasbekke, «Komsomolskaıa Pravda – Kazahstan» gazetiniń bas redaktory Vıktor Kııanısaǵa, «Ana tili» gazetiniń bas redaktory Janarbek Áshimjanǵa, «Astana» telearnasynyń taldaýshy-redaktory Jaına Jaqsylyqovaǵa tapsyryldy. Granttarǵa «Habar 24» telearnasynyń tilshisi Raýan Myńbaev, «Qazaqstan» telearnasyndaǵy «Másele» taldamalyq baǵdarlamasynyń júrgizýshisi Nartaı Sársenǵalıev, «Qazaqstan» teleradıokorporasııasy Mańǵystaý oblystyq fılıalynyń shef-redaktory Ásem Sartbaeva ıe boldy. Al el Prezıdentiniń Alǵysy «Egemen Qazaqstan» gazetimen birge, «Ekspress K», «Znamıa Trýda» jáne «Shalqar» radıosy shyǵarmashylyq ujymdaryna berildi.
Budan bólek Qasym-Jomart Toqaevtyń Alǵys hattaryn «Aıqyn» gazetiniń bas redaktory Nurtóre Júsip, «Habar» telearnasy taldamalyq baǵdarlamalar bóliminiń shef-redaktory Aleksandr Trýhachev, «Qazaqstan» telearnasynyń júrgizýshileri Qymbat Dosjan jáne Dana Nurjigit, «Habar 24» telearnasynyń shef-redaktory Shalqar Qojaev, «Qazaqstan» telearnasynyń aqparattyq-saraptamalyq baǵdarlamalar dıreksııasynyń dırektory Erlan Atambaı, «Lıter» gazeti bas redaktorynyń orynbasary Janna Oıshybaeva, «KTK» telearnasynyń bas dırektory Elmıra Djamılova, sondaı-aq «Qazaqparat» HAA jáne «Jetisý» telearnasy aldy.
Qazaqstan-Reseı jáne Qazaqstan-Qytaı yntymaqtastyǵyn nyǵaıtýǵa belsendi atsalysqany úshin Búkilreseılik memlekettik televızııa jáne radıo habarlaryn taratý kompanııasy men «CCTV» halyqaralyq telearnasy Qazaqstan Prezıdentiniń Alǵys hattarymen marapattaldy.
Memleket basshysynyń atynan elimizdiń barlyq óńirlerine jiberilgen alǵys hattar úzdik jýrnalısterge saltanatty túrde tabys etiletin bolady.