О́tken jumada bas qaladaǵy eń úlken sahnalardyń biri – Ortalyq «Qazaqstan» konsert zalynda jas talant, reseılik «Golos. Detı» jobasynyń jeńimpazy Erjan Maksım óziniń alǵashqy shyǵarmashylyq keshin zor tabyspen ótkizdi. Zalǵa ıne shanshar oryn qaldyrmaı jınalǵan halyqtyń ystyq yqylasynan-aq konserttiń kópshilik kóńilinen shyqqanyn baıqaýǵa bolady.
Bul keshke Erjan ýaqyt az bolsa da, barynsha tyńǵylyqty daıyndalypty. Sımfonııalyq orkestrdiń jáne belgili kompozıtorlar – Ulyqpan Joldasov pen Rınat Gaısınniń súıemeldeýinde oryndalǵan Erjannyń jekeleı jáne Sáken Maıǵazıev, Aıqyn Tólepbergen, Móldir Áýelbekova bastaǵan estrada ánshilerimen dýet bolyp qosyla shyrqaǵan ánderi maýsymnyń mamyrajaı keshin shyn máninde ónerdiń úlken dýmanyna aınaldyryp jibergendeı. Astana aspany jas talanttyń ánimen birge terbele tolqyp, bulttar bılep ketkendeı áser syılaǵanyn ónerdi túsinip, án ásemdigi men oryndaý sheberligin baǵalaı biletin kez kelgen tyńdarman joqqa shyǵarmaıdy dep oılaımyz.
Otandyq belgili dızaıner Qaırolla Ábishevtiń osy kesh úshin arnaıy tikken ulttyq naqyshtaǵy altyn tústes avtorlyq kıimimen kesh shymyldyǵyn túrgen dúldúl daryn eki saǵatqa sozylǵan konsertti úlken shoýǵa aınaldyrdy. Keshte Erjan reseılik «Golos. Detı» jobasynda shyrqaǵan ánderinen bólek, Arystanbek Muhamedıulynyń «Jaına, elorda», Rınat Gaısınniń «Týǵan ólkem» týyndylaryn kemeline keltire oryndady. Sondaı-aq ánshiniń repertýaryndaǵy orys, aǵylshyn, ıtalıan tilderinde shyrqalǵan ánder de konsertke jınalǵan tyńdarman kóńilinen shyǵyp, kesh sońynda Erjanǵa tolassyz qoshemet kórsetildi. Búginde ataǵy elden asyp, tanymaldylyǵy tórtkúl dúnıege tarap úlgergen darynnyń qaıtalanbas qýatty úni onyń talant qarymyn halyq aldynda taǵy bir márte áıgilegendeı. Shymyldyq jabylǵan soń da zaldan uzaq ýaqyt úzilmeı estilip turǵan kópshiliktiń ystyq qoshemeti men shapalaq úni tek Erjanǵa emes, kúlli qazaq ónerine kórsetilgen qurmet pen yqylas edi...