26 maýsymda О́skemende kópbalaly otbasylardy turǵyn úımen qamtamasyz etý máselesin sheshý jónindegi qoǵamdyq komıssııanyń kezekti otyrysy ótken edi. Osy jıynda oblystaǵy baspanaǵa muqtaj kópbalaly otbasylardy úımen qamtamasyz etý úshin ár aýdanda arnaıy komıssııa qurylǵany, aldaǵy ýaqytta 230 kópbalaly otbasy qonys toıyn toılaıtyny týraly aıtyldy. Bul maqsatta oblystyq «Paryz» qorynan tıisti qarjy bólinipti. Jýrnalısterdiń qatysýymen ashyq formatta ótken otyrysta Danıal Ahmetov qaramaǵyndaǵy aýdan ákimderine tolyq senbedi me, álde máseleniń anyq-qanyǵyna kózin jetkizeıin dedi me, óńirdiń barlyq aýdandaryndaǵy kópbalaly analarmen jeke-jeke sóılesti. «Úılerdi kórdińiz be? Másele joq pa? Erteń uıatqa qalmaımyz ba?» dep komıssııa qaraǵan úılerdiń sapasyn, ol baspanalar kóp balaly analardyń kóńilinen shyqqan-shyqpaǵanyn táptishtep surap: «Jasyrmaı aıtyńyzdar. Eger másele bolsa, birlese sheshýmiz kerek» dedi. Tipti keıbir aýdandardaǵy kópbalaly analardy aýdan ákiminiń oryntaǵyna otyrǵyzyp, saýalyn qoıyp: «Osy orynda jaqsy kórinip tursyz» dep ázildeýge de ýaqyt tapty. Oblys ákimi suraq qoıǵan kópbalaly analardyń barlyǵy derlik: «Úıdi kórdik. Kóńilimiz tolady» dep jaýap berdi. Tek aıagózdik kópbalaly ana Ásem Zeınollaqyzy: «Komıssııa múshelerine máshıne berildi. Aýyldardyń bárin kólikpen aralap kórdik. Kópbalaly analar ózderi de bardy. Sońǵy ýaqytta kópbalaly analar «baspana beriledi» degendi bir birinen estip, bizge habarlasyp, kezekke turǵysy keletindikterin aıtyp jatyr» dep baspana beriletindiginen beıhabar kópbalaly analardyń bar ekendikterin eske saldy. «Ol kisiler kezekke tursyn» dedi oblys ákimi.
Danıal Ahmetovke jeke-jeke esep bergen aýdan ákimderiniń biri aqshany únemdep, 3 úıdiń ornyna 4 úı satyp alǵandyǵyn, ekinshisi kópbalaly analardyń barlyǵynan qolhat jazdyryp alǵandyǵyn jarysa aıtty. «Aqshany ekonomdap, 5 mıllıon únemdedik. Bul qarjyǵa eki úı alýǵa bolady» dedi Glýbokoe aýdanynyń ákimi Qalıhan Baıǵonysov. Altaı aýdanynyń ákimi Nurjan Toqseıitov qordan bólingen 11 mıllıonnyń 9 mıllıonyna, Kúrshim ákimi Dýlat Qajanov 5 úı alýǵa bólingen 15 500 mıllıon teńgeniń 8 mıllıonyna baspana alynǵanyn jetkizdi. Al Zaısan aýdanynyń ákimi Serik Aqtanov 7 úıdiń ornyna 11 úı satyp alynǵanyn, Ulan aýdanynyń ákimi Nurymbet Saqtaǵanov 23 kópbalaly otbasy úılerdi ózderi tańdaǵanyn, qordan bólingen 73 mıllıon teńgeden 12 mıllıon teńge únemdelgenin tilge tıek etti.
Endigi suraq. Aýdan ákimderi únemdegen qarjyǵa kópbalaly otbasylarǵa taǵy da úıler alyna ma? Muny ýaqyt kórsete jatar.
Aıta keteıik, oblys ákimi Danıal Ahmetovtiń ózi jetekshilik etetin komıssııa quramyna kópbalaly analar, BAQ jáne qoǵamdyq birlestik ókilderi engen.
О́SKEMEN
Sýretti túsirgen V.Petýhov