Tereńkóldegi «Zelenaıa rosha» jalpy bilim berý mektebinde balalarǵa arnalǵan dástúrli «Ýlybka» jazǵy demalys lageri bıyl da uıymdastyryldy. Lagerdiń barlyq tárbıeshileri óz mektebimizdiń muǵalimderi. Olar ár balanyń ereksheligin, minez-qulqyn, qyzyǵýshylyǵyn jaqsy biledi.
Lagerdiń ashylýy dástúr boıynsha 1 maýsymda ótken bolatyn. Balalardy kúlkili kloýndar men ertegi keıipkerleri qarsy alǵan-dy. Olar sodan beri lagerge birneshe ret kelip, túrli konkýrstar men oıyndar ótkizip, jumbaqtar jasyrdy, jarys ótkizdi.
Oqýshylar úshin túrli tildik sabaqtar ótkizildi. Qazaq tili pániniń muǵalimi Y.Tursynhanova «Til – tiregim» atty úıirme uıymdastyryp, onda balalar qazaq tili boıynsha ıntellektýaldyq bilimderin kórsetti. Aǵylshyn tiliniń muǵalimi A.Temirbolatovanyń jetekshiligimen balalar «Lingvokids» úıirmesinde aǵylshyn tilin belsene úırendi.
Sabaqtardan basqa, tárbıeshiler oıyn-saýyq sharalaryn, sport jarystaryn, vıktorınalar men ártúrli konkýrstardy ótkizdi. Munyń bári balalardyń shyǵarmashylyq turǵyda jetilýine kómektesedi.
Jalpy, balalardy bilimge qyzyqtyrýdyń da túrli pedagogıkalyq tásilderi bar. Jaz mezgilinde baldyrǵandardyń ýaqyttaryn bosqa ótkizbeı, densaýlyqtaryn jaqsartyp, bilimderin jetildirýine «Ýlybka» lageri ıgilikti yqpal etti.
A.Boqaeva,
«Zelenaıa rosha» orta mektebiniń muǵalimi
Pavlodar oblysy,
Tereńkól aýdany