«Mádenıet portaly» ashyq túrde ótkizgen ádebı baıqaý eki aıǵa jalǵasyp, bas-aıaǵy 300-den astam avtor óz týyndylaryn báıgege qosqan. Saraptaı kele 220-ǵa jýyq qalamgerdiń shyǵarmalary baıqaý talabyna saı kelip, dúıim jurttyń kóz aldynda, ıaǵnı onlaın túrde baq synady. Baıqaýda oqyrman qaýymǵa kórkem shyǵarmalarymen tanylyp úlgergen qalamgerler ǵana emes, beıtanys jas talanttar da boı kórsetkenin aıta ketken jón. Báıge qorytyndysyna keletin bolsaq, «Úzdik ádebı syn» atalymy boıynsha Baǵashar Tursynbaıuly men Aınur Naımanbaeva júldeger atansa, Tursynbek Bashar Saǵat Áshimbaev atyndaǵy arnaıy syılyqqa ıe boldy. «Úzdik proza» atalymy boıynsha Qanat Tileýhan, Nurlan Havdaı júldeli oryndardardan kórinip, Mıras Muqash Sattar Erýbaev atyndaǵy syılyqqa qol jetkizdi.
«Úzdik poezııa» atalymynyń júldesine Qýanysh Ospan men Marlen Ǵılymhan laıyq dep tanylsa, Oljas Qasym Maǵjan Jumabaev atyndaǵy syılyqpen marapattaldy.
Portalda eń kóp oqylǵan aqyn Aqmaral Qalpaqova men «Meniń qurbylarym» roman-mınıatıýrasynyń avtory Aısulý Álmeshke Farıza Ońǵarsynova atyndaǵy syılyq berildi. Al ádebı baıqaýdyń Bas júldesin qanjyǵasyna baılaǵan Memlekettik «Daryn» jastar syılyǵynyń ıegeri, aqyn Aqberen Elgezekke «Semser» ádebı syılyǵy tabystalyp, saqtardan qalǵan aq semser tartý etildi.
Ádebı báıge týraly, atalǵan alamanǵa qazylyq etken Memlekettik syılyqtyń ıegeri, jazýshy Aldan Smaıyl aıtyp berdi. «Bul ózi buryn men kóp kezdestirmegen konkýrs bolyp otyr. Burynǵy dástúrli baıqaýlar sııaqty emes, aq konvertpen poshtamen jibere salyp, ol oqyldy ma, oqylmady ma, tipti jeter jerine jetti me, jetpedi me, bile almaı pushaıman bolyp otyratyn. Onlaın ári ashyq túrde ótken soń munda eshqandaı barmaqbasty, kózqysty áreketter bolmady. Jeńimpaz atanǵan shyǵarmalar ádil baǵasyn aldy dep oılaımyn», dedi ol.
Ádebı dodanyń bas demeýshisi – tabıǵı resýrstardy óndirý men óńdeý, energetıka, logıstıka jáne marketıng salalarynda álemdegi eń iri ári taraptandyrylǵan kompanııalardyń biri – Eurasian Resources Group (ERG) kompanııasy ekeni atap ketken durys.
Marjan ÁBISh,
«Egemen Qazaqstan»