Juma, 26 sáýir 2013 3:05
memleketten eki mıllıard teńge jymqyrǵan
Jumyrtqadan jún qyrqatyn kásipker taıaý jyldar ishinde memlekettiń qazynasyn 2 mlrd. teńgeden astam qarjyǵa olqy túsirip bergen. Bul týraly Shyǵys Qazaqstan oblystyq prokýratýrasynyń baspasóz qyzmeti habarlady.
Juma, 26 sáýir 2013 3:05
memleketten eki mıllıard teńge jymqyrǵan
Jumyrtqadan jún qyrqatyn kásipker taıaý jyldar ishinde memlekettiń qazynasyn 2 mlrd. teńgeden astam qarjyǵa olqy túsirip bergen. Bul týraly Shyǵys Qazaqstan oblystyq prokýratýrasynyń baspasóz qyzmeti habarlady.
Baqylaýshy organdardyń málimetine qaraǵanda, «Predgornyı elevatory» aksıonerlik qoǵamynyń basshysy A.Merzlov birneshe jyldyń kóleminde qylmystyq jolmen memleketke tıesili dándi daqyldar qoryn jymqyryp kelgen.
Altaynews.kz tilshisi barmaǵyn jalap úırenip qalǵan bıznesmenniń osy arqyly memleketti 2 mlrd. teńgeden astam qarjyǵa taqyrǵa otyrǵyzyp qoıǵanyn jazady. Mamandar qalada nan ónimderi baǵasynyń birden kúrt ósip ketýine osynyń negizgi túrtki bolǵanyn da joqqa shyǵarmaıdy…
Tergeý barysy anyqtaǵandaı, joǵaryda atalǵan kompanııa men «Azyq-túlik kelisim-shart korporasııasy ulttyq kompanııasy» aksıonerlik qoǵamy arasynda 2008 jylǵy 3 qańtarda-aq kelisim-shart jasalyp qoıylǵan eken. Sonyń negizinde artynsha Predgornyı elevatoryna úshinshi klasty 58 569 tonna astyq sheksiz merzimge saqtap qoıýǵa beriledi.
Alaıda, arada birshama ýaqyt ótkennen keıin atalmysh daqyl qambasynyń keneresi aıtarlyqtaı tómen túsip ketkeni anyq ańǵarylady.
–Ústimizdegi jylǵy naýryz aıynda oblystyq prokýratýraǵa Aýyl sharýashylyǵy mınıstrligi agroónerkásiptik keshenindegi oblystyq aýmaqtyq ınspeksııasynyń bastyǵy A.Jaqypbaevtan «Predgornyı elevatory» AQ qoımasynda saqtaýly turǵan astyqtyń is júzindegi kólemin anyqtap berý jóninde ótinish tústi, – dedi osyǵan arnalǵan brıfıngte Shyǵys Qazaqstan oblysy prokýrorynyń birinshi orynbasary Bolat Shelekenov. – Al prokýratýra qyzmetkerleri ólshep tekserýdiń nátıjesinde is júzinde 46 069 tonna kólemindegi astyqtyń qoldy bolǵanyn anyqtady. Osy arqyly memleketke 2 mıllıard teńgeden artyq zalal keltirilgeni belgili bolyp otyr.
Prokýratýra atalmysh fakt boıynsha bıylǵy 26 aqpanda qylmystyq is qozǵaǵan. Onda «Predgornyı elevatory» AQ dırektory A.Merzlovqa Qylmystyq kodekstiń 176-baby 4-tarmaǵy boıynsha aıyp taǵylǵan. Bul «ózine senip tapsyrylǵan ózgeniń múlkin ıemdený jáne talan-tarajǵa salý» degendi bildiredi.
Qazirgi tańda qylmystyq is boıynsha tergeý amaldaryn qarjy polısııasy júrgizip jatyr.
– Tergeý kezinde Merzlov Almatyda boldy. Búginde ol Shyǵys Qazaqstanǵa jetkizildi. Kúdikti óziniń astyq urlaǵany jónindegi kinásin tolyq moıyndady, – deıdi B.Shelekenov.
Taǵy bir aıtatyn jáıt, prokýratýra A.Merzlovtyń óz aıybyn moıyndap otyrǵanyna qaramastan, bul qylmysqa memlekettik organdardyń astyqty baqylaý men saqtaýǵa jaýap beretin basqa da laýazymdy tulǵalarynyń qatysy bolýy múmkin dep sanaıdy.
– Sondyqtan taǵy da muqııat tekserý júrgizilip, memlekettik organdardyń osyǵan múddeli tulǵalarynyń is-áreketterine baǵa beriletin bolady, – dep túsindirdi muny prokýratýra ókili. – Býhgalterııalyq qujattarǵa sáıkes, astyqtyń syrtqa shyǵarylǵany týraly málimetter saqtalǵan. Al Merzlovtyń ózi bul avtokólik arqyly júzege asyryldy degendi aıtady. Biraq, ózderińiz oılap kórińizdershi, orta eseppen árbiri 15-20 tonna ǵana tarta alatyn KamAZ kóligimen 43 000 tonna astyqty syrtqa tasý úshin qansha máshıne jáne qansha kún kerek bolady? Bul – onshalyqty aqylǵa syımaıtyn nárse. Demek, munda ázirge biz bilmeıtin jasyryn jatqan basqa da qylmystardyń izderi bolýy kádik.
Sonymen birge, qolda bar málimetter urlanǵan astyqtyń Qazaqstan aýmaǵynda jaratylǵanyn aıǵaqtaıdy. Qazir qylmystyq istiń qozǵalýyna baılanysty Merzlovtyń múlki men shotyna, sondaı-aq «Predgornyı elevatory» aksıonerlik qoǵamynyń óndiristik bazasyna tyıym salyndy.
Rýslan IGILIK.