Sát sapar, balettiń bolashaǵy!

Iá, stýdenttiń tańdaǵan ma­mandyǵy boıynsha birneshe jyl talmaı-tynbaı oqyǵandyǵyn, bilikti maman ekendigin kýálan­dyratyn qujat dál osy kúni jú­rekteri tolqyǵan túlek­ter­diń qolyna tabystalady. Al ol de­ge­nimiz – jas mamannyń aý­dı­­torııamen qoshtasyp, ómir­­­diń jańa belesine qadam bas­qan­dyǵynyń birden-bir dá­leli. 

О́tken aptada «Astana Opera» teatrynyń mármár zalynda Qa­zaq ulttyq horeografııa akademııasy túlekteri de osyndaı tamasha keshtiń juldyzdary atandy. Kameralyq sımfonııa orkestriniń súıemeldeýinde oryndalǵan «Jastar valsiniń» yrǵaǵynda myń burala bılep ortaǵa shyqqan balettiń bolashaq bil­girleri saltanatty keshtiń sánin kirgizdi. 

Mádenıet já­ne sport mı­nıstri Aqtoty Ra­ıym­qulova jas maman­darǵa óz qut­tyqtaýyn jetkize ke­le, Qazaqstan má­de­nıetine ǵana emes, kúlli álem mádenıetiniń damýyna úles qos­qy­sy keletin árbir túlektiń eli­miz úshin mańyz­dylyǵyn atap kórsetti. Aı­týly jıyndy óziniń quttyqtaý le­bizimen jalǵaǵan Qazaq ulttyq horeografııa aka­demııasynyń rektory, Reseı ha­lyq ártisi Altynaı Asylmu­ratova bú­gingi shákirt, er­teńgi árip­testerine aq jol ti­lep turyp, dıplomdaryn ta­bys etti. 

Bıyl úshinshi tolqyn túlek­terin uıasynan ushyrǵaly otyrǵan bilim ordasynyń osy ýaqyt ara­­lyǵynda aýyz toltyryp aıtar­­lyq jetistigi men jeńisi jeter­lik. Ony akademııa prorektory Bı­bigúl Núsipjanova zor maqta­nysh­pen atap ótti. 

– Bul kún Qazaq ulttyq horeografııa akademııasy tarıhyndaǵy eń mańyzdy oqıǵa bolyp sanala­dy. О́ıtkeni bizdiń tórt jyl boıy bap­tap, bilim nárimen sýsyn­dat­qan túlekterimiz úlken sahnaǵa jol­dama alyp, qanat qaq­qaly tur. Bizdiń ár stýdent – talantty, sulý. Sondyqtan da balet óne­riniń erteńi jarqyn bolady dep senim­men aıta alamyn. Bizdiń bala­la­rymyzdyń tek keremet balet bıshileri ǵana emes, eń bastysy, eli­mizdiń laıyqty azamattary bolýyn qalaımyn, – dedi prorektor óz sózinde.  Bıbigúl Nurǵalıqyzy atap ótkendeı, bıylǵy oqý jylynda Qazaq ulttyq horeografııa aka­de­mııasynyń 5 magıstri, 17 bakalavr jáne 21 tehnıkalyq já­ne kásiptik bilim berý maman­dy­ǵynyń stýdentteri kásibı maman atanyp, bilim shańyraǵyna qımastyqpen qol bulǵady. Túlekterdi eresek ómirge attan­dyrǵan aıtýly shara Iogann Shtraýs­­tyń ásem valsimen ádemi no­tada óz máresine jetti.  Aına ALPYSBAI,  L.N.Gýmılev atyndaǵy EUÝ-diń stýdenti