Sharanyń maqsaty - halqymyzdyń ulttyq aspabyn jan-jaqty nasıhattap, dombyra ereksheligin kópshilikke jetkizý bolyp tabyldy. Mýzeı dırektory, aqyn Qaırat Sabyrbaıdy aıtýynsha, dombyra kóshpendi halyqtyń rýhanı jaǵdaıyn, turmysy men tarıhı shyndyǵyn sıpattaýǵa múmkindik beretin qarym-qatynastyń ózindik tili bolyp tabylatyn ulttyq aspap.
-Danalarymyz ben daralarymyzǵa serik bolǵan, halqymyzdyń únin ǵasyrlar boıy asqaqtatyp kele jatqan aspabymyzdy urpaqqa úlgi etý bizdiń asyl paryzymyz,-dedi dırektor Qaırat Sabyrbaı,-dombyra kórmesine ólkemizden shyqqan elimizge tanymal ult qaıratkerleri Jánibek Kármenov, Keldenbaı О́lmesekov, Bolat Sybanov syndy tulǵalar men óner salasynyń maıtalmandarynyń jáne búginde aıtys sahnasynda óner kórsetip júrgen tanymaly aıtysker aqyndardyń dombyralary qoıyldy. Ulttyń aspaptyń «Án dombyrasy», «Kúı dombyrasy» sekildi birneshe túrge bólinetinin jáne dombyra qurylysy týraly derekterdi osy kórmeden baıqaýǵa bolady. Sonymen birge, qandaı aǵash túrlerinen jasalatyny týraly da aqparattar berilgen.
Tarıhı-ólketaný mýzeıinde ótken kórmeniń ashylý qurmetine qalamyzdyń belgili óner qaıratkerleri, ánshileri men kúıshileri óner kórsetip, estelikterin aıtty. Dombyramen súıemeldep, án-kúı oryndaýshylar Berik Omarov, Batyr Farhatov jáne №1 mýzykalyq mektep oqýshylary da sharaǵa belsene qatysyp óz ónerlerin ortaǵa saldy. Memlekettiń keleshegi búgingi urpaq ekenin eskersek, jas býynnyń ulttyq aspapty qadirleýge, rýhanı qundylyqqa tereń boılaýyna bul sharanyń bereri kóp boldy. Kesh barysynda aqyndar arnaý aıtyp, halyqpen bite qaınasyp ketken dombyra tarıhyn jyrǵa qosty.
Raýshan NUǴMANBEKOVA
«Egemen Qazaqstan»
SEMEI