Total kompanııasynyń basshylyǵymen kezdesýde munaıgaz sektory salasyndaǵy yntymaqtastyq máseleleri keńinen talqylandy. Soltústik Kaspıı jobasynda qazaqstandyq qamtýdy arttyrýǵa, Qazaqstan aýmaǵynda jańa óndirister uıymdastyrý men tehnologııalar berý úshin birlesken kompanııalardy damytýǵa erekshe nazar aýdaryldy. Kezdesý barysynda sonymen qatar jańartylatyn energııa kózderin damytý boıynsha birlesken jobalar qaraldy.
Premer-Mınıstr Asqar Mamın birlesken jobalardy iske asyrýdyń áleýmettik áseri asa mańyzdy ekenin atap ótti. Bul birinshi kezekte jańa bilikti jumys oryndaryn ashý, ol jergilikti halyqtyń nátıjeli jumyspen qamtamasyz etýge múmkindik beredi.
Kezdesý qorytyndysy boıynsha Dýnga jáne Abaı jobalary boıynsha qujattarǵa qol qoıyldy.
Dýnga ken orny boıynsha qujattarǵa QR energetıka mınıstri Qanat Bozymbaev, Kaspıı jáne Ońtústik Eýropa boıynsha «Total Barlaý jáne Ken óndirý» vıse-prezıdenti Bernar Kleman, «Oman Oıl Barlaý jáne Ken óndirý» birlesken kásiporyndary boıynsha dırektor Abdýl Vahab ál Býlýshı, «Parteks Oıl jáne Gaz» basqarma múshesi Fernando Alvesh qol qoıdy.
Kelisimge sáıkes, Dýnga ken ornynyń ónimin bólý týraly kelisimsharttyń jaramdylyq merzimi 2024 jyldan 2039 jylǵa deıin 15 jylǵa uzartylady, bul qosymsha 9 mln. tonnaǵa jýyq munaı óndirýge múmkindik beredi. Taraptar sonymen qatar Dýnga ken ornyn ıgerýdiń 3 fazasyn iske asyrý týraly kelisimge keldi, onyń aıasynda kompanııalar $300 mln-ǵa jýyq qarajat ınvestısııa salady, bul munaı óndirýdi jylyna aǵymdaǵy 600 myń tonnadan 850 myń tonnaǵa deıin eń joǵarǵy deńgeıge jetkizýge múmkindik beredi.
Qujattyń mańyzdy sharty - Ilgerlegen shkala boıynsha kelisim aıasynda kirisi mol ónim salasynda QR-nyń úlesin aǵymdaǵy 40%-dan 2025 jyldyń 1 qańtaryna qaraı 60%-ǵa deıin arttyrý. Kelisimde kompanııalardyń Qazaqstannyń ishki naryǵyna óndirilgen munaıdyń bir bóligin jetkizý jáne jyl saıyn keminde $1 mln kóleminde áleýmettik-ınfraqurylymdyq jobalardy qarjylandyrý boıynsha mindettemeleri bektiligen.
О́z kezeginde, Kaspıı teńiziniń qazaqstandyq sektorynda Abaı teńiz ýchaskesinde birlesken qyzmet aıasynda kómirsýtekterdi barlaý jáne óndirýde jer qoınaýyn paıdalaný quqyǵyn berý boıynsha tikeleı kelissózder hattamasyna Qazaqstan Energetıka birinshi vıse-mınıstri Mahambet Dosmuhambetov, «QazMunaıGaz» AQ basqarma tóraǵasynyń orynbasary Q. Esqazıev jáne ENI Ortalyq Azııa aımaǵy boıynsha atqarýshy vıse-prezıdenti Lýka Vınıatı qol qoıdy.
Jobalardy iske asyrý Kaspıı teńiziniń qazaqstandyq sektorynda kómirsýtekti barlaý jáne óndirýge ınvestısııalardy arttyrýdy qamtamasyz etedi. Qujatqa sáıkes, Abaı ýchaskesinde kómirsýtekti barlaýǵa jáne óndirýge kelisim jasalǵan, onda qarastyrylǵan: tereńdigi 2500 m birinshi izdeý-barlaý skvajınasyn burǵylaý, 700 boılyq km kóleminde 2D seısmıkalyq barlaý jumystaryn júrgizý jáne jalpy somasy 14 mlrd teńge bolatyn ózge de jumystar.
Jalpy, kelisimdi iske asyrý Qazaqstan úshin jobanyń ekonomıkalyq tıimdiligin arttyrýǵa ákeledi, sondaı-aq munaıservıstik kompanııalar úshin qosymsha jumys kólemi men qyzmetterin qurýǵa, óńirde jańa jumys oryndarynyń ashylýyna septigin tıgizedi.