Dombyra kúnine oraı Taldyqorǵan qalasynda aıtýly is-shara ótti. Jýrnalıster úıiniń aldyna jınalǵan Qaratal, Aqsý, Kóksý, Eskeldi aýdandary men Taldyqorǵan, Tekeli, Qapshaǵaı qalalarynan júzge jýyq balbarmaq kúıshiler táýlik boıyna kúı tartyp, bes júzge jýyq shyǵarmany alma-kezek oryndady. Kúmbirlegen kúıdiń úni qala turǵyndary men qonaqtaryn baýrap, kórermender qatary shaqyrýsyz kóbeıe tústi. Jýrnalıster úıiniń aldyndaǵy alyp ekrannan tikeleı efır arqyly kórsetilgen dombyrashylar óneri jınalǵandardyń rýhyn serpiltip, qulaq quryshyn qandyrdy.
Aıtpaqshy, «Dombyra – dala daýysy» atty búl kúı keshi «Qazaqstandyq Gınnes rekordtar» kitabyna enetin boldy. Júzge jýyq dombyrashynyń 500 kúıdi táýlik boıyna toqtaýsyz shertýi rekordtar kitabynyń ókilderin qyzyqtyryp, erekshe baǵalaýda laıyq dep tanylypty. Jetisýlyq dombyrashylardyń rekordtyq kórsetkishin moıyndaý týraly arnaıy sertıfıkatty «Qazaqstandyq Gınnes rekordtar» kitaby departamentiniń dırektory Baqytjan Tastúlekov sharanyń uıymdastyrýshysy, Almaty oblystyq ishki saıasat basqarmasynyń basshysy Rýstam Alpysbaevqa tabys etti.
Almaty oblysy