Kórmege elimizdiń belgili etno-dızaıneri, Prezıdenttiń «Altyn sapa» syılyǵynyń laýreaty Yrza Tursynzadanyń tigin jáne qoldanbaly ónerdi úıretý sabaqtaryna, trenıng-semınarlarlaryna qatysqan kóp balaly analardyń jumystary qoıyldy. Úsh jyldan beri búkil respýblıka boıynsha tegin kýrstar ótkizip kelgen qolóner sheberi san myńdaǵan áıelge tiginshiliktiń qyr-syryn kórsetti. Ásirese kóp balaly analardyń berekeli kásipti bastaýyna jol ashyp júrgen ismer jyl basynan beri myńnan asa áıelge óz ónerin aqysyz úıretken.
«Tabysy tómen kóp balaly analar óz kásibin ashyp, ony tabys kózine aınaldyrǵan elimizdiń isker áıelderinen úlgi alýy kerek. О́ıtkeni, bul tek ómir súrý sapasyn jaqsartýǵa ǵana emes, jumys oryndaryn qurýǵa múmkindik beredi. «Eńbek» memlekettik baǵdarlamasy aıasynda jańa bıznes-ıdeıalaryn júzege asyrý úshin kóp balaly aýyl turǵyndaryna 505 myń teńgege deıin granttar beriledi. Sondaı-aq kóp balaly otbasylar, múgedek azamattar men jastarǵa 5 myń jeńildetilgen mıkrokredıt berýge kvota qarastyrylǵan. Osynyń nátıjesinde bıyl 15 myń kóp balaly otbasy óz isin ashyp, tabysyn arttyrýǵa múmkindik alady», dedi kórmege kelgen mınıstr Berdibek Saparbaev.
Jórgektegi balasyn terbete júrip tikken kórpe-jastyqtaryn kórmege ákelgen 8 balanyń anasy Ásııa Ospanqulovany sózge tarttyq. Ustazdyqpen aınalysa júrip, eńbek demalysynda tegin kýrsqa qatysyp tiginshilikti meńgergen «Altyn alqaly» ananyń talpynysyna tań qaldyq. «Adamda ynta bolsa bárine úlgerýge bolady. Myna kórpelerdi balalar uıyqtaǵanda otyryp eki tún tiktim. Qolónerge qyzdarymnyń da qyzyǵýshylyǵy artyp keledi. Bul biz sııaqty kóp balaly analarǵa taptyrmas kásip dep oılaımyn. Aldaǵy ýaqytta osy ónerdi qosymsha tabys kózine aınaldyrý oıymda bar», deıdi Nur-Sultan qalasy №17 mektep-gımnazııasynyń muǵalimi.
42 jastaǵy 9 balanyń anasy Álıda Otarbaeva bolsa qarjyger mamandyǵyn meńgerip, sol salada talaı jyl eńbek etken. Bala kezinen toqyma toqyp, tigin tigýdi áýes qylǵan altyn qursaqty ana mańyndaǵylardyń tapsyrysymen ulttyq kıim-keshekter de tigip júrgen kórinedi. О́tken aıda Yrza Tursynzadanyń 4 kúndik kýrsyna qatysqan ol da quraq kórpelerin kórmege qoıdy. Álıda Otarbaevanyń aldaǵy jospary anyq. Ol – seh ashyp, qasyna sheber qyz-kelinshekterdi jınaý.
«Áıel – shańyraqtyń shyraqshysy, berekeniń uıytqysy. Jasyratyny joq, kóptegen názik jandylardyń naryqpen birge kelgen bolmysy bóten kásippen aınalysyp ketkeni ras. Áıel túzde júrse altyn uıasynyń jylýy azaıady, urpaqtyń tárbıesi kemıdi. Atanyń dástúrimen, ananyń altyn saýsaǵymen jetken ulttyq qolónerimizdiń qasıeti de osynda. Bul – kıeli óner. Tól kásibimizben aınalysqan qyzdyń qylyǵy túzelip, bolmysy ózgeredi. Ulttyq qundylyǵymyzdy uǵynady. Tek ózińizdiń ýaqytyńyz ben shabytyńyzǵa ǵana táýeldi etetin bul kásiptiń ryzyǵy mol. Otbasy, oshaq qasynan shyqpaı-aq aı saıynǵy tabysyn 500 myń teńgeden asyryp otyrǵan kóp balaly analar bar», dedi sóz alǵan «Altyn orda» dızaınerlik úıiniń dırektory Yrza Tursynzada.
Aq jelektilerdiń arasynda taǵdyryn tarıhı Otanymen baılanystyrǵan qandastarymyz da boldy. Qytaıdan kelgenine eki jyl ǵana bolǵan Maıra Jáıtinbek jýrnalıstıka salasynda 10 jyldan asa eńbek etipti. «Anam on saýsaǵynan óner tamǵan kisi edi. Kesteli kórpe, oıýly syrmaqtyń túr-túrin tigetin. Sony kórip óssek te, úkimet jumysyn istep, aılyq alýdy úlken mártebe sezindik. Shynymdy aıtsam, quraq kórpeniń ózi quny joǵary kásiptiń kózi ekenin oılaǵan da emespin. «Ana kórgen ton pisher» deıdi, bul óner maǵan jat bolǵan joq, meńgerý de ońaı boldy. Birinshiden, bul – bizdiń ulaǵattaýǵa tatıtyn ulttyq qundylyǵymyz. Ekinshiden, biz – qyz tárbıelep otyrǵan anamyz. Ulttyq ónerdiń olardyń ósýine tıgizer septigi mol ekeni anyq. Osyny kórip ósken bala erteńgi kúni otbasyna meıirimdi, ıkemdi bolady. Úshinshiden, eshkimge alaqan jaımastan balamdy baǵyp, otymdy jaǵyp júrip-aq tabys tabýǵa múmkindik bolady eken. Tórtinshiden, bul – óte kórkem jumys. Telefonnan alystap, jasampazdyq, shyǵarmashylyq kúıde bolasyń. Ondaı adam eshýaqytta basqa bireýdiń basyndaǵy problemaǵa nazar aýdarýǵa murshasy bolmaıdy. Naqty maqsatpen ýaqyt ótkizgen kisiniń kóńil kúıi de turaqty bolady eken», deıdi kóp keshikpeı kásibin bastaýdy kózdep otyrǵan Maıra Jáıtinbek.
Kórme kezinde qasıetti ónerdiń qalpyn buzbaýǵa ýáde etken belsendi analarǵa mınıstrlik pen qala ákimdiginiń alǵys haty berilip, tigin mashınalary tartý etildi.
Maıgúl SULTAN,
«Egemen Qazaqstan»