Ondaǵy elder de Qazaqstan basymdyqtaryna qoldaý bildirýde
EQYU-nyń Is basyndaǵy tóraǵasynyń arnaýly ókili, Qazaqstan Respýblıkasy Syrtqy ister mınıstriniń orynbasary Konstantın Jıgalovtyń Ońtústik-Shyǵys Eýropa elderine sapary odan ári jalǵasýda.
Budan buryn onyń Albanııaǵa barǵan sapary týraly aıtqan edik. Tıranadan keıin onyń sapary Chernogorııa astanasy Podgorısede jalǵasty. Munda Konstantın Jıgalov osy el Premer-mınıstriniń orynbasary Svetozar Marovıch, Syrtqy ister mınıstri Mılan Rochen jáne Parlament spıkeriniń orynbasary Rıfat Rastodermen kezdesti.
О́ziniń táýelsizdigin jarııalaǵanyna tórt-aq jyl bolǵan jas memleket bul kúnderi Eýropamen ıntegrasııalanýǵa baǵyttalǵan reformalardy qyzý júrgizýde. Osy maqsatta oǵan EQYU-nyń qoldaýy aýadaı qajet. Qazir eldiń astanasynda Uıymnyń dalalyq ókildigi ornalasqan. Endi Is basyndaǵy tóraǵanyń arnaıy ókiliniń kelýi eldiń demokratııalyq reformalardy damyta túsýine eleýli yqpal eter degen senim bar.
Kezdesýler barysynda Uıym men Chernogorııa jáne Qazaqstan men Chernogorııa arasyndaǵy qarym-qatynastardyń keıbir perspektıvalary talqylandy. K.Jıgalov Uıym sheńberinde ótkiziletin bolashaq sharalar týraly baıandap, olarǵa Chernogorııa ókiliniń qatysýyn qalaıtynyn jetkizdi.
Burynǵy Iýgoslavııanyń belgili qalalarynyń biri, kezinde Qysqy olımpıadalardyń biri ótken Saraevo qalasy – qazir táýelsiz Bosnııa men Gersegovınanyń astanasy. Is basyndaǵy tóraǵa arnaýly ókiliniń sapary Balqan túbegindegi osy qalada jalǵasty. Bosnııa men Gersegovına sońǵy jyldarǵa deıin osy túbektegi ǵana emes, Eýropa qurlyǵyna aty shyǵyp turǵan turaqsyzdyq pen qaýiptiń oshaǵy bolyp keldi. Táýelsizdikke umtylǵan eldiń ishinde turaqsyzdyq otyn tutatýǵa talpynǵan ishki-syrtqy kúshter az emes edi. Sondyqtan da, EQYU bul eldegi beıbit qurylystyń tezirek aıaqtalýyna belsendi túrde kirisip keledi. Is basyndaǵy tóraǵanyń ókilin jyly qarsy alýdyń sebebi de sol bolatyn.
Qazaqstandyq dıplomat munda Bosnııa men Gersegovına Parlamenti tóralqasynyń tóraǵasy Harıs Sıladjıchpen, Syrtqy ister mınıstriniń orynbasary A.Trıshıch-Babıchpen jáne Eýroodaqtyń Joǵarǵy jáne arnaýly ókili Valentın Inskomen kezdesip, ekijaqty kelissózder júrgizdi. K.Jıgalovtyń sózine qaraǵanda konstıtýsııalyq reformalardy tabysty júrgizý úshin eldegi barlyq saıası kúshterdiń únqatysý barysynda qabyldanǵan konsensýstyq sheshimderine qol jetkizý kerek. Mundaı órkenıetti únqatysý osy jyldyń qazan aıynda elde bolatyn saılaýdyń qarsańynda ásirese ózekti.
Osy qatarda EQYU-nyń 56 múshesi de biraýyzdan Bosnııa men Gersegovınanyń ókili Dýnıa Mııatovıchti Uıymnyń BAQ máseleleri jónindegi jańa ókili etip saılaǵanyn aıta ketý kerek. Osynyń ózinen-aq EQYU-nyń barlyq múshelerge teń qatynas jasaıtynyn kórýge bolady.
Jalpy alǵanda, qazaqstandyq delegasııanyń Balqan túbegi elderine jasaǵan sapary tabysty boldy.
Talǵat JUMAǴULOV – Saraevodan.