Qazaqstannyń bes dúrkin chempıony «Astana» Chempıondar lıgasynyń alǵashqy irikteý kezeńinde elordadaǵy «Astana Arena» stadıonynda Rýmynııanyń bes dúrkin chempıony ChFR (Klýj) klýbyn qabyldady. 2013/2014 jylǵy maýsymnan beri Eýrokýbok básekelerine turaqty túrde qatysyp kele jatqan «Astana» alǵashqy jyly ǵana birinshi qarsylasynan jeńilip qalǵan. Al sońǵy bes maýsym boıy alǵashqy qarsylasyn esh qıyndyqsyz jeńip keledi. Bıyl da dástúrden jańylmaı 20 myńǵa jýyq jankúıer jınalǵan stadıonda Rýmynııadan kelgen qarsylastarynan 1:0 esebimen basym tústi.
Jasyratyny joq, birinshi taımnyń alǵashqy 10 mınýtynda qarsylastar oıyn tizginin óz qoldaryna alýǵa tyrysty. Tipti, alǵashqy qaýipti shabýyldy da rýmyndar jasady. Degenmen, stadıonǵa jınalǵan qalyń jankúıerdiń qoldaýyn sezingen «Astana» fýtbolshylary namysqa tyrysyp, oıyn aýanyn ózderine aýdara bildi. «Astana» sapynan Dorın Rotarıý men Marın Tomasov ChFR qaqpashysyn biraz ábigerge salǵanymen, gol soǵa almady.
Ekinshi taımda da qonaqtar oıyndy qarqyndy bastady. Erıch qaqpasynyń mańynda birqatar qaýipti shabýyl uıymdastyryp, esepti ashyǵý umytyldy. Dese de oıyndaǵy jalǵyz goldy matchty 68-mınýtynda «Astana» qorǵaýshysy Evgenıı Postnıkov soqty. Kóziqaraqty jankúıerlerdiń esinde bolsa, Postnıkov ótken maýsymdarda da Fınlıandııanyń HIK, Chehııanyń «Iаblones» klýbtarynyń qaqpasyna mańyzdy gol soqqan bolatyn.
Aıta keteıik, «Astana» – ChFR Klýj arasyndaǵy qarymta match bir aptadan soń, 17 shildede Rýmynııada ótedi. Eger elorda komandasy syrt alańdaǵy oıynda da jeńiske jetetin bolsa, Chempıondar lıgasynyń ekinshi kezeńinde Izraıldiń «Makkabı Tel-Avıv» komandasymen kezdesedi. Esterińizde bolsa, «Astana» komandasy «Makkabımen» 2017/2018 jylǵy Eýropa lıgasynyń toptyq kezeńinde synǵa túsip, eki oıynda da «Astana» (4:0, 1:0) jeńiske jetken bolatyn.