Baspasóz máslıhatynda Kásipkerler palatasy dırektorynyń agroónerkásiptik keshen máseleleri boıynsha orynbasary Pirmuhammed Syzdyqov: «Búgingi baspasóz máslıhatyn ótkizýge sebep bolyp otyrǵan jaǵdaı jaqynda ǵana áleýmettik jelide «Baıdala» mekemesiniń kúrishine qatysty jarııalanǵan jalǵan beınejazba. Naqty zerdeleý jumystary júrgizilmeı taratylǵan aqparattyń saldarynan kásipker shyǵynǵa ushyrap otyr. Kásipker Palataǵa kelip bizden kómek surady. Qazir zańgerlerimiz quqyqtyq qoldaý kórsetýde», - dedi.
«Baıdala» JShS dırektorynyń orynbasary Azamat Baıdalıev kompanııanyń búginde oblysqa qarasty Shıeli, Syrdarııa, Jalaǵash aýdandarynda kúrish egip, ony óz zaýyttarynda aqtaıtyndyqtaryn jetkizdi. Búginde «Baıdalanyń» zaýytynda turaqty 80 adam jumys jasasa, egindikterde maýsymdyq jumystarǵa 2000-ǵa jýyq adam tartylǵan. О́nimderin Tájikstan, Ýkraına, Rossııa, О́zbekstan, Qyrǵyzstan jáne ózge de elderge eksportqa shyǵarýda.
«Áleýmettik jelide taralǵan jalǵan aqparat bizdiń kompanııa bedeline nuqsan keltirip tur. Mundaı beınematerıaldy taratý kimge tıimdi ekendigin bilmeımin. Qazir taratýshyny anyqtaý jóninde ishki ister organdaryna shaǵymymyzdy qaldyrdyq. Jalǵan aqparat taratýshy anyqtalǵan jaǵdaıda ári qaraı sotqa beretin bolamyz», - dedi.
Baspasóz máslıhatynyń qorytyndysymen Kásipkerler palatasy dırektorynyń orynbasary Pirmuhammed Syzdyqov Palata tarapynan kásipkerge jan-jaqty qoldaý, kómek kórsetiletindigin jetkizdi.