Mýzeı dırektory, aqyn Qaırat Sabyrbaıdyń aıtýynsha, dombyra kóshpendi halyqtyń rýhanı jaǵdaıyn, turmysy men tarıhı shyndyǵyn sıpattaýǵa múmkindik beretin qarym-qatynastyń ózindik tili bolyp tabylady.
– Danalarymyz ben daralarymyzǵa serik bolǵan, halqymyzdyń únin ǵasyrlar boıy asqaqtatyp kele jatqan aspabymyzdy urpaqqa úlgi etý bizdiń asyl paryzymyz, – dedi Qaırat Sabyrbaı. – Dombyra kórmesine ólkemizden shyqqan elimizge tanymal Jánibek Kármenov, Keldenbaı О́lmesekov, Bolat Sybanov syndy tulǵalar men óner salasynyń maıtalmandarynyń jáne búginde aıtys sahnasynda óner kórsetip júrgen belgili aıtysker aqyndardyń dombyralary qoıyldy. Ulttyq aspaptyń «Án dombyrasy», «Kúı dombyrasy» sekildi birneshe túrge bólinetinin jáne onyń qurylysy týraly derekterdi osy kórmeden bilýge bolady. Sonymen birge qandaı aǵash túrlerinen jasalatyny jaıynda da aqparattar berilgen.
Tarıhı-ólketaný mýzeıinde ótken kórmeniń ashylý saltanatynda qalamyzdyń belgili óner qaıratkerleri, ánshileri men kúıshileri óner kórsetip, estelikterin aıtty. Dombyramen súıemeldep, án-kúı oryndaýshylar Berik Omarov, Batyr Farhatov jáne №1 mýzykalyq mektep oqýshylary da sharaǵa belsene qatysyp óz ónerlerin ortaǵa saldy. Kesh barysynda aqyndar arnaý aıtyp, halyqpen bite qaınasyp ketken dombyra tarıhyn jyrǵa qosty.
Raýshan NUǴMANBEK,
«Egemen Qazaqstan»
SEMEI