Qıyrdaǵy qandastarymyz qazaq tilin qanshalyqty biledi? О́zge elde ómir súrip jatqan aǵaıynnyń ana tilimizge degen qurmeti qandaı dárejede? Atyraýda ótken «Qazaqstan – ata jurtym, qasıetim – ana tilim» atty qazaq tili men ádebıetinen halyqaralyq olımpıada qorytyndysy jaqsy kórsetkishtermen kóńil qýantty. Qytaı, Mońǵolııa, Reseı, Qyrǵyzstan, Iran, О́zbekstan memleketterinen kelgen qazaq balalary Atyraýda tórt kún boıy biliktilikterin synǵa saldy.
– Qazaq dıasporasy ókilderiniń basqa elderde tursa da, ana tilderin jetik meńgergenderi, óz tilderinde sóılep, bilimderin jetildiretinderi anyq kórindi, –dedi olımpıada júldegerlerin marapattaý saltanatynda oblys ákiminiń birinshi orynbasary Serik Shapkenov. – Halyq danalyǵynda aıtylǵandaı, óz tilin umytqan ult tamyryn joǵaltady. Ulttyq qundylyqtardy boılaryna sińirgen osyndaı balalar barda qazaq tiliniń bolashaǵy da baıandy.
Halyqaralyq olımpıada qorytyndysy boıynsha, bes qatysýshy altyn medal, 8 qatysýshy kúmis, 15 qatysýshy qola medal ıelendi.
Oblystyq bilim berý basqarmasy basshysynyń mindetin atqarýshy Jansulý Tóremuratova olımpıada júldegerlerine elimizdegi bes ýnıversıtette tegin oqý granty berilgenin aıtady. Bilim dodasyna qatysqan 62 oqýshynyń eshqaısysy ataýsyz qalmady. «Daryn» respýblıkalyq ǵylymı-tájirıbelik ortalyǵy dástúrli túrde uıymdastyratyn bilim jarysyna osy joly Atyraý oblysy ákimdigi qoldaý kórsetti. Atajurttan alysta júrgen qazaq balalaryn yntalandyrýǵa baǵyttalǵan shara bıyl 16-shy ret ótip otyr. Uıymdastyrýshylar óner-bilim báıgesinde, ásirese О́zbekstannan kelgen oqýshylardyń jaqsy nátıje kórsetip, marapattardyń basym bóligin jeńip alǵandaryn aıtty.