Ákesi maıdan dalasyna attanǵanda Borıa alty jasta bolǵan. Keskin-kelbetin fotolarǵa qarap qana elestete alady.
«Ákemmen qaqaǵan qysta saban jınaǵanym esimde. Úlken deneli, keń ıyqty qalpynda esimde jattalyp qalypty», deıdi uly.
Nıkolaı Ivanovıch surapyl shaıqastardyń birinde 1942 jyly 24 mamyrda qaza tapqan. Borıs ákesiniń qaıda jerlengenin surastyryp, tıisti oryndarǵa birneshe ret saýal joldaǵanymen, esh nátıje bermegen. Izdeý jasaqtarynan da kómek suraǵan.
Endi, mine, arada 77 jyl ótkende Borıs Býrkovtyń úıine qýanyshty habar kelgen. Novgorod oblystyq qoǵamdyq uıymynyń «Nahodka» dep atalatyn izdeý jasaǵynyń jetekshisi Nıkolaı Býrkovtyń denesi tabylǵanyn habarlaǵan. Medalonda aty-jónimen qosa Novokamenka aýylynyń týmasy ekeni jazylǵan.
Eńbek ardageri jıenimen birge jerleý rásimine týǵan jerden bir ýys topyraq ala barǵan. Polıa derevnıasynda 60 jaýyngerdiń denesi jer qoınyna qaıta tapsyrylǵan.
Soltústik Qazaqstan oblysy