Zańda ósimpuldardy esepten shyǵarý ókiletti organ - Qarjy mınıstrligi belgilegen tártip boıynsha júrgiziletini qarastyrylǵan.
Q. Baedilov habarlaǵandaı, jaqynda, shamamen shilde aıynyń úshinshi onkúndiginde ósimpuldardy esepten shyǵarý boıynsha jumystar bastalady.
Atalǵan Erejelerge sáıkes, árbir aýdandyq memlekettik kirister basqarmasynda ósimpuldardy esepten shyǵarý boıynsha komıssııa qurylady. Bul komıssııa fýnksııasyna qaryzdar somasyn ótegen salyq tóleýshilerdi irikteý úshin derbes esepshottardy túgendeý boıynsha kúndelikti jumystar, 3 jumys kúni ishinde qaryzdaryn ótegen salyq tóleýshiler boıynsha ósimpuldardy esepten shyǵarý týraly sheshimdi shyǵarý kiredi. Sonymen qatar, sheshim shyǵarylǵan kúnnen bastap 3 kúnnen keshiktirmeı salyq tóleýshiniń derbes esepshottary boıynsha ósimpuldar esepten shyǵarylady.
Qaryzynyń somasyn jeke tulǵalar Memlekettik kirister komıtetiniń ınternet-resýrsy nemese elektrondy Úkimet portaly (E-gov.kz) arqyly bile alady.
«Arnaıy ótinish jazyp, memlekettik kirister organdaryna qandaı da bir qujattardy ákelýdiń qajeti joq. Eń bastysy - ótken jyldardaǵy óziniń mindettemeleri boıynsha negizgi salyq somasyn tóleý. Memlekettik kirister organdary kún saıyn derbes shottarynyń jaı-kúıine monıtorıng jasaıtyn bolady jáne olar negizgi boryshty tólegen kezde ósimpuldy esepten shyǵarý týraly tıisti sheshimdi 3 jumys kúninen keshiktirmeı shyǵarady», - dedi qarjy vıse-mınıstri.
Búginde «Salyq tóleýshi kabıneti» veb-qosymshasynda derbes esepshotyn kórý úshin ESQ kerek. Biraq ESQ qoldanbaı-aq qaryzy týraly bilýge bolady, ol úshin Memlekettik kirister komıtetiniń ınternet-resýrsynda JSN boıynsha málimetterdi onlaın-rejımde alýǵa múmkindik beretin servıs iske qosylǵan.
Q. Baedilovtyń aıtýynsha, ósimpuldardy esepten shyǵarý jeke tulǵanyń barlyq salyqtyq mindettemeleri boıynsha júrgiziledi.
Negizinen, olar jeke tulǵanyń jeke menshigine - jerine, múlkine, kóligine salynatyn salyqtar, sondaı-aq múlikti satý kezinde qunynyń ósiminen múlik salyǵyn alýmen baılanysty jeke tabys salyǵy boıynsha mindettemeler. Jalǵyz shart - 2019 jyldyń sońyna deıin 2019 jyldyń 1 qańtaryna deıingi salyqtyq kezeńdegi salyq mindettemeleri boıynsha paıda bolǵan qaryzdaryn tóleý. Iаǵnı jeke tulǵa tek ótken jyldardaǵy negizgi qaryz somasyn óteýi kerek, al ósimpuldar somasy esepten shyǵarylady.
Sonymen qosa, aǵymdaǵy jyldyń basynan beri negizgi qaryzdy tólegen jaǵdaıda ósimpuldar men aıyppuldardy esepten shyǵarý boıynsha shaǵyn jáne orta bıznes sýbektileri úshin salyqtyq raqymshylyq júrgizilip keledi. 2019 jyldyń 1 shildesindegi jaǵdaı boıynsha 40 myńǵa jýyq salyq tóleýshi 7,6 mlrd somasyna negizgi qaryzyn ótegen, olar boıynsha 2,1 mlrd teńge somasyna ósimpuldar men 180,6 mln somasyna aıyppuldar esepten shyǵarylǵan. Salyqtyq raqymshylyq aǵymdaǵy jyldyń sońyna deıin sozylady.