«Zeren-2019» respýblıkalyq tanymdyq jastar jazǵy lageri Aqparat jáne qoǵamdyq damý mınıstrliginiń bastamasymen uıymdastyrylyp, Qazaqstanda Jastar jylyn ótkizý boıynsha Jol kartasy sheńberinde júzege asyrylýda.
9 kún boıy qatysýshylarǵa Dos Kóshim, Erlan Mustafın, Maqsut Jumaev, Tımýr Qudaıbergenov, Álıhan Báımenov jáne basqa da tanymal tulǵalar dáris oqıdy.
Eske sala keteıik, jastar jazǵy lageri úsh kezeńnen turady. Ár kezeńde 200 qatysýshy baq synap, jalpy úsh kezeń boıynsha barlyǵy 600 adam qatysady. Lagerde turý jáne bilim alý tegin. Birinshi kezeń 3 – 11 shilde aralyǵynda ótip, jeńimpazdar kúni keshe anyqtaldy. Ekinshi kezeń 13 – 21 shilde aralyǵynda ótse, úshinshi kezeń 23 – 31 shilde aralyǵynda ótpek.
Qatysýshylar azamattyq qoǵamdy damytý, kásipkerlik daǵdylary, jasyl ekonomıka, kreatıvti ekonomıka jáne jańa medıa salalary boıynsha túrli jobalar ázirleıdi. Ár komandaǵa tájirıbeli tálimger-mentorlar taǵaıyndalady. Olar jastarǵa jol siltep, bıznes ıdeıalarynyń júzege asýyna kómek qolyn sozady.
Zerendikter jobaǵa qatysty ıntellektýaldy jumystardan bólek, kúndelikti belsendi sport seksııalaryna qatysady. Ár tańda saǵat 07:00-den 08:00-ge deıin komandalyq sport jarystaryna qatysyp, keshkisin FireTime (alaý mańyndaǵy kezdesý) ýaqytynda yntalandyrýshy spıkerlermen óz ıdeıalary men josparlaryn talqylaıdy.
Aıta keteıik, «Zeren» lageriniń sarapshylary joba sońynda eń úzdik bıznes-ıdeıalardy anyqtaıdy. Úsh maýsymnyń jalpy júlde qory 15 mln teńge. 3 – 11 shilde aralyǵynda ótken birinshi maýsymnyń qorytyndysy boıynsha 5 úzdik joba tańdaldy. Jobalardy júzege asyrý úshin 7 mln teńge saltanatty túrde tabys etildi.