Kezdesý barysynda eki el arasyndaǵy ekonomıkalyq, saýda-sattyq áriptestiktik baılanysty arttyrý joldary talqylandy.
«Soltústik Qazaqstan – agrarly oblys. Eksport kólemi ulǵaıyp keledi. Bıyl aýyl sharýashylyǵyna tartylǵan syrtqy ınvestısııa 54 prosentke ósti. Maıly daqyldar 1 mıllıon gektarǵa jýyq alqapqa egildi. Reseıdiń alty mıllıonnan astam turǵyny bar Túmen, Qorǵan jáne Omby oblystarymen shekaralasamyz. Eýropadan Qıyr Shyǵysqa, onyń ishinde Qytaı baǵytyndaǵy júk aǵynynyń 70 prosentteıi Petropavl arqyly tasymaldanady. Aýǵanstan – oblys taýarlary eksporttalatyn elderdiń biri. Sondyqtan bizde bul eldiń naryǵyna qyzyǵýshylyq bar», dedi Qumar Irgebaıuly.
Farhat Mýhammad bul kezdesýdiń Aýǵanstan úshin de mańyzdy ekenin jetkizdi. Onyń aıtýynsha, Qazaqstan Aýǵanstanǵa árqashan gýmanıtarlyq kómek kórsetip, bilim berý, kásipkerlik, saýda salalarynda qoldaý bildirip turady. Oblystan bıdaı satyp alyp, jemis, kókónis eksporttaýǵa daıynbyz. Sondaı-aq sizderdiń qoldaýlaryńyz arqyly ónimderimizdi Reseıdiń sizdermen kórshiles úsh oblysyna da jetkizsek deımiz. Aldaǵy ýaqytta Almatyda eki memlekettiń taýar óndirýshileri qatysatyn alqaly jıyn ótedi. Bul sharada eki el arasyndaǵy yntymaqtastyq týraly memorandýmǵa qol qoıýdy josparlap otyrmyz, dedi elshi.
Jıynda Aýǵanstannyń áleýmettik-ekonomıkalyq damý kórsetkishteri, ınvestısııa salýǵa bolatyn salalary týraly slaıd kórsetildi. Elimiz Aýǵanstanmen saýda-sattyq boıynsha tórtinshi orynda tur. Byltyr eki el arasyndaǵy ózara saýda 520,6 mıllıon dollardy quraǵan. Aýǵanstan naryǵynda bıdaı, zyǵyr jáne jasymyq joǵary suranysqa ıe. Bul el jylyna 1,6 mıllıon tonna astyq tutynady.
Bıyl óńir boıynsha Aýǵanstanǵa 13 mıllıon dollardyń ónimderi satylǵan.
«Tımırıazev un úgý kombınaty» JShS-niń bas dırektory Isa Allahıarov delegasııa músheleriniń nazaryn daıyn ónimderdi satyp alýǵa aýdardy.