Jaz shyǵa salysymen Jambyl óńirinde dala órti jıi beleń ala bastady. Jambyl oblystyq tótenshe jaǵdaılar departamentiniń málimetinshe, jaz mezgilinde bir ǵana T.Rysqulov aýdanynyń ózinde jalpy aýmaǵy 500 gektarǵa jýyq dala órtke oranǵan.
Al, 14 shilde kúni aýdandaǵy Qaraqystaq aýylyndaǵy "Maqsat" sharýa qojalyǵyna qarasty egis alqaby órtendi.
T.Rysqulov aýdany ákiminiń orynbasary Erlan Baqytjanuly órt saldarynan 40 gektar arpa, 20 gektar jaıylymdyq jer kúıgenin aıtty. Al, T.Rysqulov aýdany boıynsha tótenshe jaǵdaılar bóliminiń basshysy Jandar Seıtimbetovtiń aıtýynsha, órt kúndizgi saǵat 11:30 shamasynda bastalyp, keshki saǵat 17:17 shamasynda aýyzdyqtalǵan. Tótenshe jaǵdaıǵa 45 adam jáne 15 tehnıka kúshi tartylǵan.