Ol - halyqshyl! Jastardyń tárbıesi men bilimine qyraǵylyq tanytyp, múmkindiginshe ultty tárbıeleý kerektigine kóp kóńil bóletin. Qazaq óz balasyn dáripteýge kelgende aldyna jan salmaı tym asyra maqtaıtynyn jaqtyra da bermeıtin. Ultty qandaı kásipke beıimdeý kerektigin, qandaı mamandyqty tańdaýǵa mán berý kerektigine damyǵan elderdiń tájirıbesimen bólisip, keńes qurýdy quptaıtyn.
Ol – jańashyl! Álemdegi eń úzdik jetistikterden qazaq qoǵamynyń qalys qalmaýyn eskertip otyratyn. Ǵylymdaǵy, ekonomıkadaǵy, mádenıettegi tańqalarlyq jańalyqtarǵa qyzyǵyp, erekshe den qoıyp, adamzat ıgiligi jolynda jasalǵan álemdik jańalyqtarǵa baladaı qýana alatyn tazalyǵy qaıran qaldyratyn.
Ol – qarapaıym! Qarapaıymdylyq adam balasynyń báriniń boıynan tabyla bermeıtin uly qasıet.
Ol – óte bilimdi! Bul sózdi Q.K. Toqaevtyń basshylyǵynda bes jyl qyzmette bolǵandyqtan aıtyp otyrmyn.
2011 jyly Q.K. Toqaevtyń Birikken Ulttar Uıymyna jaýapty qyzmetke taǵaıyndalýyna baılanysty elimizdiń aqparat quraldary tolassyz habarlap jatty. Osy jańalyqty estigen kezde óz erkimmen aryz berip memlekettik qyzmetten ketkenim bar. Sebebi buryn-sońdy kórmegen Q.K. Toqaev basshylyq etken úlken mektepti kórdim. Memleketshildikti, eńbekqorlyqty, adaldyqty, adamgershilikti kórdim. Árbir memlekettik qyzmetker Toqaevtyń deńgeıinde qajyrly jumys isteı alýy múmkin be dep oıladym. Múmkin bolmasa memlekettik qyzmet atqarýǵa haqysy bar ma?..
Ol – meıirimdi! QR Parlament Senatynyń Tóraǵasy qyzmetinde joǵary laýazymdaǵy shendilermen qatar zııaly tulǵalardy, qarapaıym qyzmetkerlerdi de jeke qabyldaýyna shaqyratyn. Qarapaıym adamdardyń oıyn tyńdap, jıi pikirlesetin. Bıliktegi shendiler mundaı qadamǵa aıaq baspaýshy edi.
Jıyrma jyl memlekettik qyzmette jumys istegen kezimde birde-bir mınıstrdiń, vıse-mınıstrdiń, departament dırektorynyń boıynan mundaı tárbıeni boıyna sińirgen memlekettik qyzmettegi tulǵany kezdestirgen emespin. Olar joǵarǵy jaqtan buıryq bolsa ǵana nemese ózinen dárejesi, dańqy artqandardy ǵana qabyldaýshy edi. Qyzmetten bas tartyp, óz erkimmen aryz berýimniń basty sebebi de endi Toqaevtaı basshynyń bolýy neǵaıbil ekenin uǵynýym boldy.