Asyq atýdan Qazaqstannyń eńbek sińirgen bapkeri Jomart Sabyrjanovtyń aıtýynsha, erteden kele jatqan ulttyq oıyn boıynsha 2010 jyly sport jáne dene shynyqtyrý isteri komıteti janynan «Asyq atý» respýblıkalyq federasııasy qurylyp, IýNESKO tizimine engizilgen. Búgingi chempıonatta er azamattar asyq atýdan, al qyzdar bolsa bes asyq oıyny boıynsha baq synasty. Uıymdastyrýshylardyń sózinshe, jasóspirimder arasynda atalmysh sport túri keńinen tanymal.
«Sońǵy jyldary asyq atý oıyny jaqsy damyp keledi. Ásirese, jastar qyzyǵýshylyǵy jaqsy. Buryn mektepterde óńirlerde dop tebetin bolsa, qazir asyq atady», deıdi J. Sabyrjanov.
Shymkent qalasynyń namysyn qorǵap kelgen Ahmetraýanı Saparbek alǵashqy kezeńde soltústikqazaqstandyq qarsylasyn 2-1 esebimen tize búktirdi. Ol 1,5 jyldan beri osy oıyn túrimen jattyǵady eken.
Qostanaılyq Mereke Shanabaı– bes asyq oıynynan Qazaqstannyń chempıony. Oıyn erejesi boıynsha 12 jattyǵý jasap, 15 mınýt ishinde 150 upaı jınaý kerek bolsa, ol dittegen maqsatyn 12 mınýtta oryndap, jeńimpaz atandy.
Jarys qorytyndysy boıynsha uldar arasyndaǵy básekede Nur-Sultan qalasynyń komandasy birinshi oryndy ıelendi. Ekinshi, úshinshi oryndardy qaraǵandylyqtar men jambyldyqtar bólisti.
Qyzdar arasynda jeńistiń eń bıik tuǵyryna qostanaılyqtar kóterildi. Alań ıeleri ekinshi, shymkenttikter úshinshi oryndy qanaǵat tutty.
Chempıonat qorytyndysy boıynsha jeńimpazdar arnaıy medaldarmen marapattalyp, eń úzdikter el quramasyna qabyldanady.
Soltústik Qazaqstan oblysy