Oblystyq densaýlyq saqtaý basqarmasynyń málimeti boıynsha, 11 247 oqýshydan túrli aýrýlar anyqtalǵan. Ásirese as qorytý júıesi buzylǵan balalar kóp. Ekinshi orynda kóz aýrýlary. Mektep oqýshylarynyń 28,4 paıyzynyń kózi nashar kóredi. Júrek-qantamyr, júıke júıesi aýrýlaryna shaldyqqandardyń da paıyzdyq úlesi joǵary.
Dúnıejúzilik densaýlyq saqtaý uıymynyń «Densaýlyqty nyǵaıtýǵa múmkindik beretin mektepter», «Salaýatty ýnıversıtetter» dep atalatyn jobalarynyń mańyzdylyǵyn osydan da ańǵarýǵa bolady. 2016 jyly Nur-Sultan, Almaty qalalarynda, Mańǵystaý, Qyzylorda oblystarynda qanatqaqty joba retinde engizilgen bul bastama jaqsy nátıje bergen. Az ýaqyttyń ishinde balalardyń densaýlyqtary ońalyp, bilim oshaqtarynda oń ózgerister baıqalǵan. Oblystyq taýarlar men kórsetiletin qyzmetterdiń sapasy men qaýipsizdigin baqylaý departamenti basshysynyń orynbasary Amantaı Jumaǵalıevtiń aıtýynsha, atalǵan jobalar munaıly aımaqta da iske asa bastady.
Bir atap óterligi, jańa jobany iske asyrýǵa kedergi keltiretin jaıttar bar. Oqýshylardy taza aýyz sýmen qamtý problemasy áli ózektiligin joıǵan joq. «Mysaly, Qurmanǵazy aýdanynda osy maqsatqa qarajat qarastyrylmaǵan, - deıdi departament ókili. – Oblys boıynsha 21 mektepte sport zaly bolmaǵandyqtan, balalardyń dene shynyqtyrý sabaqtarynda múmkindikteri shekteýli bolyp otyr». Al Atyraý qalasyndaǵy 49 mekteptiń 16-sy ǵana qajet jabdyqtarmen tolyq qamtylǵan. 33 mektepte medısınalyq quraldar jetispeıdi. Osy olqylyqtardyń ornyn toltyryp, jańa jobany belsendi iske asyrý úshin bilim ordalary yntymaqtastyq memorandýmyna qol qoıǵan. Balalar arasyndaǵy aýrýshańdylyq deńgeıin tómendetip, salamatty ómir saltyn qalyptastyrýǵa túrtki bolatyn joba ótken jyly óńirdegi 27 mektepte engizilse, bıyl bul kórsetkishti 38-ge jetkizý josparlanyp otyr.
ATYRAÝ