Jıynǵa Qazaqstan halqy Assambleıasy Tóraǵasynyń orynbasary Janseıit Túımebaev, Memleket jáne qoǵam qaıratkeri Myrzataı Joldasbekov, Mádenıet jáne sport mınıstri Aqtoty Raıymqulova, Qazaqstan Respýblıkasynyń Tuńǵysh Prezıdenti – Elbasy kitaphanasy dırektorynyń orynbasary Kúlaısha Aqtaeva, Parlament Májilisiniń depýtattary, QHA músheleri, basqa da etno-mádenı birlestik, zııaly qaýym ókilderi qatysty.
Kitap qazaq elindegi qoǵamdyq kelisim men jalpyulttyq birlik ıdeıasynyń negizin qalaýshy, Qazaqstan halqy Assambleıasynyń Tóraǵasy Nursultan Ábishuly Nazarbaevqa arnalady. Jınaqqa Qazaqstan halqy Assambleıasynyń qurýshysy, Tuńǵysh Prezıdent Nursultan Nazarbaevtyń 1995-2019 jyldardaǵy sessııalarda sóılegen sózderi, Elbasynyń jeke arhıvinen alynǵan jáne kitaphana qorynda saqtalǵan qundy sýretter men qujattar engen. Sondaı-aq jınaqta saıası turaqtylyq pen ultaralyq kelisimniń qazaqstandyq úlgisiniń avtory N.Nazarbaev týraly jaryq kórgen maqalalar men etno-mádenı birlestik ókilderiniń Elbasyna joldaǵan júrekjardy lebizderi, QHA-nyń basqa qurylymdary basshylarynyń Elbasyna alǵystary berilgen.
Jıyn shymyldyǵyn ashqan Janseıit Túımebaev «Qazaqstan halqy Assambleıasy osy tarıhı sátke erekshe mán berdi. Bul sharany tek ádettegi jınalys retinde emes, qoǵamdyq kelisim men jalpyulttyq birlikti aıqyndaıtyn, jasampaz ıdeıalarǵa ıe qaıtalanbas shyǵarmanyń kópshilik nazaryna usynylǵan kúni dep qabyl etińizder. El tarıhynda Assambleıanyń qurylýy mańyzdy turaqtandyrýshy faktor bolyp qalyptasty. Esterińizde bolar, 1995 jyly Qazaqstannyń saıası júıesi ózara úılesimsizdiktiń áserinen qıyn daǵdarysqa tap boldy. Osy kezde Elbasy kóregendiginiń saıası aıǵaǵy retinde Assambleıa quryldy. Osylaısha, bılik pen qoǵam arasyndaǵy izgiliktiń kópiri ornady. Bul saıası qadamdaǵy Nursultan Ábishulynyń sara joly eshqashan da umytylmaq emes», dedi.
Sonymen birge J.Túımebaev keńes berýshi organ retinde qurylǵan Assambleıa jalpyulttyq dıalogtyń alańyna aınalǵanyn, Qazaqstandy reformalaý men damytýdyń ózekti máseleleriniń barlyǵynda ún qosqanyn jetkizdi. «Búgingi tańda Assambleıanyń bastamasy arqasynda bizdiń ómirimizde Saıası qýǵyn-súrgin men ashtyq qurbandaryn eske alý, Alǵys aıtý kúni, Qazaqstan halqynyń birligi kúni sekildi uǵymdar paıda boldy. Osy atalǵan rýhanı isterdiń barlyǵy óziniń bastaýyn Assambleıa sessııalarynan alady», dedi QHA Tóraǵasynyń orynbasary.
Memleket jáne qoǵam qaıratkeri Myrzataı Joldasbekov Assambleıa músheleri men jıynǵa qatysýshylardy quttyqtap, Elbasyna, Qazaqstan halqy Assambleıasyna qatysty estelikterimen bólisti. «Elbasymen 1958 jyly orta mekteptiń 10 synyp oqýshysy kezinde tanystym. Sodan beri habar úzilgen emes, aralasyp turatynbyz. Bul Assambleıanyń qurylǵan kezinde de basy-qasynda boldym. Assambleıanyń elimizdegi orny erekshe. Búgingi jınaqtan da osynaý mańyzdy uıymǵa qatysty saraly oılar men qundy derekter engenin kóre alasyzdar», dedi.