Qoldanystaǵy zańnamaǵa engizilgen ózgeristerge baılanysty endi jıhaz ben jeńil ónerkásiptegi kásiporyndar ındýstrııalyq sertıfıkatpen ǵana memlekettik satyp alýlarǵa qatysa alady.
Oblystyq kásipkerler palatasynyń bólim mamany Aıgúl Maqsotova «Indýstrııalyq sertıfıkaty bar kásipkerler memlekettik satyp alýlarǵa qatysady, «Samuryq-Qazyna» holdınginiń otandyq taýar óndirýshiler tizimine enedi jáne syrtqy naryqtarda otandyq taýar, jumys, qyzmet túrlerin ilgeriletý boıynsha shyǵyndary óteledi», deıdi. «Atameken» UKP básekege qabilettilikti arttyrýǵa negizdelgen bul jańalyqty áli de jetildirý baǵytynda jumys istep jatyr. Mamannyń sózine súıensek, sertıfıkatty alý úshin aldymen salalyq qaýymdastyq usynǵan sarapshy kásiporynnyń barlyq qujattaryn qarap, óndiriske kóshpeli taldaý júrgizedi, qujattardaǵy málimetter men naqty ahýaldyń sáıkestigin salystyrady. Sodan keıin sarapshynyń qabyldaǵan sheshimi negizinde О́ńirlik kásipkerler palatasy jergilikti atqarýshy organmen birlese otyryp, óndiristik tekserý júrgizedi. Barlyq tekserý sharalarynan ótken kásiporyn ǵana taýar, jumys, qyzmet kórsetý boıynsha otandyq óndirýshilerdiń tizimine enedi. Atyraýda ındýstrııalyq sertıfıkatty alǵashqylardyń qatarynda Qazaq sańyraýlar qoǵamynyń Atyraý oqý-óndiristik kásiporny men Qazaq soqyrlar qoǵamynyń óńirdegi oqý-óndiristik kásiporny aldy.
Kórý qabileti nashar jandardy jumysqa ornalastyrý baǵytyndaǵy mekemede qazir 35 adam eńbek etedi. Kórpe-tósek jabdyqtary, matras, muraǵatqa arnalǵan qoraptar daıyndaıtyn, jıhaz shyǵaratyn sehtary bar. Kásiporyn basshysy Sábıt Qatyshev «Indýstrııalyq sertıfıkat – jalǵan kásipkerliktiń táýekelin azaıtyp, óndirýshilerge básekege qabiletti ortada jumys isteýge múmkindik beredi», deıdi. Atyraý oblysynda ázirge 4 kásiporyn ǵana jańa qujatqa qol jetkizdi.
ATYRAÝ