Jan-jaqtan at terletip kelgen toıshylar bir jyldy artqa tastap, aman-esen júzdeskenderine shúkirshilik etip, bir-birinen esen-saýlyq surasyp jatty. Quryltaıǵa arnaıy shaqyrylǵan soltústikqazaqstandyq delegasııa quramynda Qazaqstan halqy oblystyq assambleıasynyń ókilderi men kórkemónerpazdar ujymdary boldy. Kil ónerpazdar dombyranyń qulaǵynda oınap, qazaq ánderin naqyshyna keltire shyrqady. Oıyn-saýyq baǵdarlamasy aıasynda bulshyq etteri bult-bult oınaǵan, kermede baılanǵan sáıgúlikteı shıyrshyq atqan balýandar beldesip, jastar jaǵy altybaqan tebisti. Jurtshylyq nazaryna sol óńirdiń 11 mýnısıpalıteti tikken aq shańqan kıiz úıler usynylyp, bas júldeni Ishım qazaqtarynyń ulttyq-mádenı avtonomııasy jeńip aldy. Nur-Sultan qalasynyń sán teatry kórsetken ulttyq kıimder men at sporty boıynsha báıge toıdyń sánin keltirip, kórermenderdi umytylmas áserge bóledi.
Búginde Reseıde 700 myńnan astam etnostyq qazaq turady. Túmen qandastarymyz kóp qonystanǵan oblys sanalady. Olar ata-babalarynyń tilin, salt-dástúrin, ádet-ǵurpyn umytpaý maqsatynda osymen 23-inshi ret quryltaı ótkizip, ata-baba amanatyna berik ekendikterin tanytty. Quryltaıǵa Qorǵan, Sverdlov, Omby jáne Chelıabi oblystarynan da meımandar at basyn tirep, ortaq qýanyshty bólisti. Ata-jurtymyzdan qoldap kelgen baýyrlarymyz az bolǵan joq. Soltústik Qazaqstan oblysymen qatar Pavlodar, Nur-Sultan, Qaraǵandy jáne О́skemen qalalarynan jınalǵan baýyrlarymyzǵa bek rızamyz, dedi Túmen oblysy qazaqtary ulttyq-mádenı avtonomııasynyń tóraǵasy Esenǵalı Ibraev.
Qazaqstandyqtar kásiporyndardy aralap, ınvestısııa tartý joldarymen, týrızm salasynyń jetistikterimen tanysty. Búginde júzden astam qazaqstandyq kásipker túmendiktermen tyǵyz áriptestik qarym-qatynas ornatqan. Qazaqstanmen bıznes baılanys ornatýǵa talpynǵan reseılik kásiporyndar az emes. Solardyń biri «Tıýmenstalmost» zaýyty elimizdegi iri kólik ınfraqurylym nysandarymen qoıan-qoltyq jumys isteýde. Quryltaı barysynda «Jusan» halyqaralyq kásipkerler birlestigi men «Otandastar qory» AQ arasynda birlesken jobanyń tusaýy kesildi. «Otandastar qory» AQ-nyń ókili Toǵaıbaı Rysbektiń aıtýynsha, ekijaqty kelisim nátıjesinde qoldanbaly óner sheberlerin, onyń ishinde ulttyq kıim-keshek pen turmystyq zattar jasaýshylardy qoldaý aıasy odan saıyn keńeıe túspek.
Forýmnyń keńeıtilgen májilisinde qazaqtardyń óńirlik ulttyq-mádenı avtonomııasynyń jumysy, aldaǵy jospary talqylandy. Onda baıandama jasaǵan Esenǵalı Ibraev Túmen oblysynda 20 myńnan astam qazaq turatynyn, avtonomııa jumysynyń basty baǵyttarynyń biri ulttyq salt-dástúrimiz men ádet-ǵurpymyzdy saqtaý ekenin, jergilikti turǵyndar tarapynan quryltaıǵa degen ystyq yqylas pen jyly qoshemet jyl saıyn artyp kele jatqanyn atap ótti.
Saǵyndyq SALMURZIN,
Dúnıejúzi qazaqtary qaýymdastyǵynyń múshesi
Soltústik Qazaqstan oblysy