Búgin Taraz qalalyq mádenıet úıinde kópke kómegi tıgen kásipkerlerdi marapattaý rásimi ótti. Qala ákimi Qaırat Dosaev mesenat azamattarǵa «Jomart júrek» syılyǵyn tabys etti. «Búginde Elbasynyń «Týǵan jerge týyńdy tik» uranyna qoldaý bildirip, qalada áleýmettik-mádenı ǵımarattardy, saıabaqtar men murajaılardy qalpyna keltirý men qurylysyn júrgizý baǵytynda aýqymdy jumystar atqarylýda. «Rýhanı jańǵyrý» baǵdarlamasy aıasynda qalada 2 saıabaq qalpyna keltirilip, qaıta jańǵyrtyldy. Bir mádenıet nysany, 4 ámbebap sport alańshalary paıdalanýǵa berildi. Mesenattarymyz kópbalaly otbasylarǵa eki páter kiltin tabystasa, sport chempıony múgedek bala asyrap otyrǵan otbasyna avtokólik tabys etti. Bıyl da muqtaj jandarǵa qolushyn sozyp, kómek kórsetetin azamattar sany arta túsedi dep senemin», dedi ákim óz sózinde.
Jıyn barysynda áleýmettik az qamtylǵan jáne kópbalaly otbasylardyń 50 mıllıon teńge kólemindegi kommýnaldyq tólemaqy qaryzdary men ósimpuldaryna qaıyrymdylyq kómek kórsetkeni úshin «Jyl mesenaty» atalymy «Tarazenergoortalyq» AQ prezıdenti Baqbergen Máýlenovke tabystaldy. Sonymen qatar, «Jyl tulǵasy» atalymy «Agrospesstroı» JShS-niń dırektory Marat Rahımberdıevke berildi. Kásiporyn basshysy óz qurylys kompanııasymen kóptegen iri qurylys nysandaryn salyp, paıdalanýǵa bergen. Seriktestik jyl saıyn qarttar úıine, jetim jáne ata-anasynyń qamqorlyǵynan aırylǵan balalarǵa, múmkindigi shekteýli jandarǵa qaıyrymdylyq kómek kórsetip keledi. Aýǵan soǵysynyń ardageri, qala turǵyny A.Mojarovtyń turǵyn úıin kúrdeli jóndeýden ótkizip berdi. «Týǵan jerge týyńdy tik!» keń kólemdi aksııasy aıasynda mekeme jumysshylarynyń baspanaly bolýyna óz yqpalyn tıgizip, «Jeńis» saıabaǵynyń abattandyrylýyna demeýshi retinde úles qosty.
Sondaı-aq, «Týǵan ólke» atalymymen «Meıirim» medısınalyq ortalyǵynyń quryltaıshysy Gúldara Nurymova, «Júrekten júrekke» atalymymen jeke kásipker Merýert Leshtaeva, «Jyldyń úzdik uıymy» atalymymen Taraz qalalyq №1 aýrýhanasynyń bas dárigeri Nurlan Ábildaev, «Eren eriktilik» atalymymen «Jasyl El» eńbek jasaǵynyń belsendisi, volonter Marııam Kenjemuratova, «Batyl júrek» atalymymen Taraz qalalyq polısııa basqarmasy jergilikti polısııa qyzmetiniń ýchaskelik polısııa ınspektory, polısııa kapıtany Danııar Zaýrbek syndy azamattar marapattaldy.
Jambyl oblysy