Jaqynda ǵana «Egemende» jarııalanǵan «Qoldan jasalǵan bılet tapshylyǵy» atty maqalada jolaýshylar poıyzdaryna bılet alýdyń qıyndyǵy jan-jaqty jazylyp, bul máselege Memleket basshysy Qasym-Jomart Toqaev nazar aýdaryp, maqalany týıtterdegi paraqshasynda bólise otyryp, Úkimetke bılet satý júıesindegi qoldan jasalǵan tapshylyqty joıý jóninde tapsyrma bergen bolatyn.
Mine, Indýstrııa jáne ınfraqurylymdyq damý mınıstrliginiń bul qadamy Prezıdent tapsyrmasyn oryndaý bastamalarynyń biri bolsa kerek.
«Qazirgi ýaqytta bıletterdi zańsyz qaıta satý «Ákimshilik quqyq buzýshylyq týraly» kodekstiń 449-babyndaǵy «Qoǵamdyq oryndarda tıisý» boıynsha ǵana ákimshilik jaýapkershilikti kózdeıdi. Basqa jaýapkershilik ázirshe joq», delingen resmı habarlamada. Bul bapta «Qoǵamdyq oryndarda zattardy ózgeshe tásilmen satyp alý, satý, aıyrbastaý nemese ıemdený maqsatynda kásipkerlik sýbektisi bolyp tabylmaıtyn adam jasaǵan, sondaı-aq bal ashý, qaıyrshylyq, seksýaldyq sıpatta qyzmetter kórsetý ne ózge de qyzmetter kórsetýdi kúshtep tańý maqsatynda tıisý, ıaǵnı mazalap ótinish bildirý – jeke tulǵalarǵa eskertý jasaýǵa ne bes aılyq eseptik kórsetkish mólsherinde aıyppul salýǵa ákep soǵady» delinip, áreket bir jyldyń ishinde qaıtalanǵan jaǵdaıdyń ózinde on aılyq eseptik kórsetkish mólsherinde aıyppul salýǵa ne bes táýlikke deıingi merzimge ákimshilik qamaqqa alý jazasymen ǵana shekteledi.
Mınıstrliktiń habarlamasynda qazaqstandyq tasymaldaýshylarǵa turaqty negizde jolaýshylar vagondary parkin jańartý úshin jaǵdaı jasalyp jatqany aıtylǵan.
Resmı málimdeme: «Budan basqa tasymaldaýshylar jyl saıyn jazǵy kezeńde negizgi baǵyttar boıynsha qosymsha poıyzdar sanyn qosady. Sonymen qatar jolaýshylar aǵymynyń ulǵaıýyna baılanysty negizgi baǵyttar boıynsha bıletterdiń jasandy tapshylyǵy baıqalady, bul rette olardy satý boıynsha zańsyz deldaldar jandana túsedi. Bıletterdiń zańsyz satylýyna tosqaýyl qoıý úshin osy jyldyń naýryz aıynda IIDM, Sybaılas jemqorlyqqa qarsy is-qımyl agenttigi jáne «Qazaqstan temir joly» Ulttyq kompanııasy» AQ arasynda temirjol tasymaldaýy salasynda turmystyq sybaılas jemqorlyq máselelerin boldyrmaý kózdelgen jol kartasyna qol qoıyldy. Osy qujatqa sáıkes «QTJ» UK» AQ bıletterdi satý jáne jolaýshylardy poıyzǵa otyrǵyzý kezinde zańsyz is-qımyldar jasaýdy baqylaý jáne shekteý ádisterin qarastyra otyryp, bılet satatyn «Mobius» júıesin jetildirý qajet dep tapty. Alaıda bıletterdi zańsyz satý faktileri jalǵasýda» dep tolyqtyryla túsken.
Sonymen birge 28 shilde kúni IIDM Kólik komıteti qoǵamdyq uıymdarmen jáne quqyq qorǵaý organdarymen birlesip ótkizgen reıdter kezinde Shymkent, Almaty, Nur-Sultan, Atyraý jáne Taraz qalalarynyń vokzaldarynda bıletterdi joǵary baǵamen usynatyn, sondaı-aq qajetti poıyzǵa bıletsiz-aq otyrǵyzýǵa ýáde bergen deldaldar bolǵany týraly derekter anyqtalǵan. Osyǵan baılanysty 6 adam ÁQBtK-niń 449-baby negizinde «Qoǵamdyq oryndarda tıisý» boıynsha ákimshilik jaýapkershilikke tartylǵan.
Anyqtalǵan faktiler boıynsha mınıstrlik «QTJ» UK» AQ «Jolaýshylar tasymaly» AQ men Magıstraldyq jeli dıreksııasynyń laýazymdy tulǵalaryna qatysty sharalar qabyldaý qajettigin, sondaı-aq bıletterdi zańsyz satýǵa qatysqan jeke bılet kassalarymen shartty buzý qajettigin atap ótti.