Bul óńir energııaǵa tapshy. Almaty JEO-lary, Qapshaǵaı jáne Almaty SES kaskadtary, Esik SES-i, Moınaq SES-i, Qaratal SES-i óńirdegi elektr energııasynyń negizgi kózderi sanalady.
Búgingi tańda óziniń qýat óndirý kózderi bolmaǵandyqtan, Almaty oblysynyń elektr energııasyna degen qajettiligin jergilikti qýat kózderi 50%-ǵa ǵana qanaǵattandyrady.
«Shelek dálizinde jel elektr stansasyn salý arqyly parnık gazdaryn (SO2) shyǵarý jylyna 206 myń tonnaǵa azaıady, sondaı-aq jylyna 89 myń tonna shartty otyn aýystyrylady. Onyń ústine, jel elektr stansasy qorshaǵan ortaǵa áser etpeı otyryp, elektr energııasynyń qoryn tolyqtyrýǵa múmkindik beredi», dedi «Samuryq-Energo» AQ jobalaý keńsesiniń basshysy Ernur Jıenbaev.
Nysannyń qurylysy kezeńinde 300 jumys orny ashylyp, stansa iske qosylǵannan keıin turaqty negizdegi 14 jumys orny paıda bolady. JES jylyna 225 750 myń kVt elektr energııasyn óndiredi dep kútilýde. Jobanyń aıaqtalý merzimi – 2020 jyl.
Atap óteıik, stansa jıyntyq qýaty 60 MVt bolatyn 24 jel energetıkalyq qondyrǵydan, qosalqy stansadan jáne elektr jelilerinen turady. Nysannyń agregattary jel stansasyn avtomatty basqarý júıesine negizdelgen apparattyq-baǵdarlamalyq keshen arqyly retteledi. Bul modeldiń artyqshylyǵy sol, ony sýyq kontınentaldy klımat (–30…+43 S), 10 baldyq seısmıkalyq belsendilik jáne jeldiń ekpini II klass jaǵdaıynda paıdalanýǵa bolady.
Esterińizge sala keteıik, «Samuryq-Energo» AQ buǵan deıin JEK salasyndaǵy 2 jobany: Qapshaǵaı qalasyndaǵy 2 MVt kún elektr stansasyn jáne Ereımentaý qalasyndaǵy 45 MVt Jel elektr stansasyn iske asyrǵan bolatyn.