Al osy at ábzelderi men túlki tymaqty on saýsaǵy joq azamat tikti degenge qalaı qaraısyz?! Senbeseńiz de rasy sol.
Qazaly aýdanyndaǵy Abaı aýylynyń atpaldaı azamaty Ońdashbaı О́temis birde qysta joq qarap júrip, attan qulaıdy. Jaqyn jerde kómektese qoıar jan ıesi joq, atynan aıyrylǵan azamat úsikke urynady. Keıin dárigerler Ońdashbaıdyń úsik urǵan on saýsaǵyn kesip tastaýǵa májbúr bolady.
«On saýsaǵym joq, endi ómir osymen bitti» dep qabyrǵaǵa júzin berip búk túsip, ókinishten ózegi órtenip jatatyn azamatyń Ońdashbaı emes. Buryn da qol ismerligimen tanylǵan jigit tymaqtan másige deıin ózi tigip, jurttyń keregin aıyra bastaǵan. Keıinnen el aǵalarynyń sóz kómegi dárý bolyp, kásip ashýǵa bekindi.
Al kásip ashamyn, sol arqyly násibimdi aıyramyn degen azamatqa arnalǵan memlekettik baǵdarlamalar az emes.
Osylaısha Ońdashbaı «Bıznestiń jol kartasy-2020» baǵdarlamasy boıynsha qaıtarymsyz grantqa ıe boldy. Grantqa alǵan 900 myń teńgege óndiristik tigin mashınasyn satyp aldy. Qanynda bar ismerlik báribir tynysh jatqyzbaıdy eken. О́ndiristik tigin mashınasy qolyna tıgennen keıin kıiz úıge kerekti bar jabdyqty tige bastady. Sonymen qatar Ońdashbaıdyń tigin sheberhanasynda júgennen bastap toqymǵa deıin bar.
«Bala kezimnen qumar isim bolashaqta kásibime aınalar dep oılamappyn, – deıdi Ońdashbaı. – Buryn aýyldaǵylar ǵana tapsyrys beretin. Búginde aýdan ortalyqtarynan kelip, buıymtaıyn aıtatyndar bar. Adamǵa qýanysh syılaǵan jaqsy ǵoı. Onyń ústine tegin jasap jatqan joqpyn».
On saýsaǵynan aıyrylsa da Ońdashbaıdyń qolynan kelmeıtini joq. Qyl aıaǵy uıaly telefony buzylǵandar da onyń úıin tabady. Kóptiń keregine jaraǵan úlken baqyt qoı.
Taǵdyrdyń tálkegin kórgen keı adamdar ómir sol kúnmen bitkendeı opynyp, alǵa basqan aıaǵyn keri ketiredi. Dúnıeden baz keshedi. Al armany asqaq, el alǵysyn alyp júrgen Ońdashbaılar sondaı jandarǵa úlgi bolsa, qanekı.
Qyzylorda oblysy