Qazaq úshin besikten kıeli ne bar?! Ata-babamyz qasıet tutqan besik – árbir úıdiń tórinde turatyn qundy dúnıe. Kónekóz qarııalardyń «besigiń tarylmasyn, besigiń terbelsin» dep bata berýi de kóp maǵynany bildirse kerek. Osyndaı aq batamen kóktep, kógerip otyrǵan araldyq Amanovtar otbasynda bir ǵasyr terbelgen besik bar.
Atadan balaǵa mura bolyp qalǵan baǵaly jádigerge bul áýlettiń tórt urpaǵy kýá desek, qatelespeımiz. Qazirde toqsan jasqa taıap qalǵan Raıhan apa bul besikti qaıynatasynyń óz qolymen, bir shege qaqpaı jasaǵanyn aıtady.
– Meniń estýimshe, qaıynatamyz ben enemizde bala turaqtamaı, týyla sala shetinep kete bergen. Sodan keıin atamyz nıettenip óz qolymen besik jasapty. Qudaıdan alaqan jaıyp, osy besikke jatatyn bir sábı bere gór dep tilepti. Kóp uzamaı olardyń tilegi qabyl bolyp, eki ul bala dúnıege kelipti. Sonyń biri – meniń joldasym Úbaıdýlla. Al qazir bul besikke shóberelerimiz terbelip ósýde. Biz úshin qundy dúnıe bolǵandyqtan, ony balalaryma árqashan amanat etip aıtyp otyramyn. Úlken balam ony maılap qoıady. Qazir qaladaǵy kishi balamnyń úıinde saqtaýly tur. Besik degen balanyń uıasy ǵoı. Sábıdiń uıqysy tynysh, denesi taza bolady,– deıdi keıýana.
Túrli tehnıkalardyń damyǵan zamanynda elektrondy besikti oılap tapqandar da bar. О́zi terbeletin besik, árıne jaqsy-aq. Alaıda, qazaqtyń kıeli dúnıesi baǵa jetpes baılyq bolyp qala bermek.
Aısáýle QARAPAEVA
Qyzylorda oblysy