QR Prezıdenti Ákimshiliginiń basshysy Qyrymbek Kósherbaev Shymkenttiń eks-ákimi Ǵabıdolla Ábdirahymovtyń otstavkasy týraly pikir bildirdi, dep habarlaıdy QazAqparat
Onyń aıtýynsha, Ǵ. Ábdirahymov halyq aldyndaǵy jaýapkershiligin tolyq uǵynǵan joq.
«El Prezıdenti Qasym-Jomart Toqaev aıtqandaı, qazirgi basty mindet – halyqtyń senimi, halyq pen bılik arasynda dıalog ornatý. О́zderińiz jaqsy bilesizder, Ǵabıdolla Ábdirahymov el bıliginen qoldaý taýyp, taýdaı senim arqalady. Ony elimizdegi eń laýazymdy ári jaýapty qyzmetterge taǵaıyndady. О́kinishke qaraı, muny ózi jetkilikti túrde uǵynǵan joq», dedi Q. Kósherbaev Shymkent qalalyq máslıhatynyń sessııasynda. Prezıdent Ákimshiliginiń jetekshisi eks-ákimniń unamsyz qylyqtaryn atap ótti.
«Onyń qylyqtary BAQ pen áleýmettik jelilerde egjeı-tegjeıli jarııalanyp júrdi. Munyń bári dál qazirgi ýaqytta – halyq memleket qoldaýyna muqtaj bolyp otyrǵanda, Arys endi ǵana eńsesin tiktep, Túrkistan jańaryp, elimiz jańa zamannyń syn-qaterine jaýap izdep jatqanda boldy. Bul - Memleket basshysynyń tapsyrmalaryna kereǵar, bıliktiń abyroıyn túsiretin jaǵdaı. Búginde Ǵabıdolla Ábdirahymovqa artylǵan saıası senim shegine jetti. Halyq bıliktiń barlyq tarmaǵynyń adal jumysyna laıyq. Osyǵan baılanysty óńir basshylary halyqqa qaltqysyz qyzmet etip, ózderin kelisti ustaýy kerek», dep túıindedi sózin Qyrymbek Kósherbaev.
Eske sala ketsek, búgin Memleket basshysynyń Jarlyǵymen Ǵabıdolla Ábdirahymov Shymkent qalasynyń ákimi laýazymynan bosatyldy. Onyń ornyna osy kúnge deıin Otyrar aýdanyn basqaryp kelgen Erlan Aıtahanov taǵaıyndaldy.