Qostanaı oblysynyń aýdandarynda polıseıler jetkiliksiz. Bul týraly Oblystyq polısııa departamentiniń baspasóz qyzmeti «Polısııa departamenti bastyǵynyń orynbasary Ardaq Yntyqbaev málimdedi» dep habarlady.
Polısııa departamentinde óńirge qarasty polısııa basqarmalary men bólimsheleri bastyqtary orynbasarlarynyń qatysýymen ótken jınalysta kadr jasaqtaý máselesi kóterildi. Polısııa polkovnıgi A.Yntyqbaevtyń aıtýynsha, tártip saqshylary qataryn tolyqtyrý úshin atqarylar birqatar jumys kútip tur. Jergilikti jerde jastarmen kezdesýler uıymdastyrylyp, ishki ister organyna qyzmetke ornalasý jeńildikteri qarastyrylmaq.
Mysaly, búginde kadr tapshylyǵy Qostanaı jáne Rýdnyı qalasy men Jitiqara, Sarykól aýdandarynda aıqyn baıqalady.
«Ishki ister organdarynda tek bilimdi ári shynyqqan shymyr, kásibı daıyndyǵy myqty azamattar ǵana jumys isteı alady. Iá, talap tym joǵary, soǵan qaramastan yntalylar da kóp, tek túsindirý jumystary tıisti deńgeıde júrmeı jatyr. Ásirese, aýyldy jerlerde. Búginderi polısııa qyzmetiniń jaýapkershiligimen qatar, áleýmettik mártebesi jáne qarjylyq jaǵdaıy da jaqsaryp keledi. Sondaı-aq, organda jumys isteıtin azamattarǵa basqa da jeńildikter qarastyrylǵan. Bul óz Otany úshin adal qyzmet etý múmkindigi» dedi departament bastyǵynyń orynbasary, polısııa polkovnıgi Ardaq Yntyqbaev.
Májiliste, ásirese, shalǵaıdaǵy eldi mekenderge maman tartý máselesi qaraldy. Ál-ázir jastardyń aýylǵa barǵysy joq, degenmen aýdandyq polısııa bólimsheleri qol qýsyryp otyrmaıdy. Joǵary oqý oryndarynda oqıtyn, áskerı boryshyn ótep júrgen jastarmen turaqty kezdesýler ótip turady. Tipti, ózge oblystaǵy jastarǵa da usynys aıtýda. Máselen, Rýdnyı qalalyq Polısııa basqarmasyna jýyrda Túrkistan oblysynan jas maman kelmek.
Ardaq Yntyqbaev jastardy tártip saqshysy bolýǵa, polsııa qatarynda qyzmet etýge shaqyrdy.