Qazaqstandyq kásipker Memleket basshysy qandaı aıaq kıim satyp alǵany týraly aıtty. Bul týraly tengrinews.kz habarlady.
Kompanııa quryltaıshylarynyń biri ári basqarýshy dırektory Dáýren Rahmanqul fabrıka Almaty qalasynda ornalasqanyn tilge tıek etip, Prezıdenttiń óz taýaryn satyp alýy kútpegen jaǵdaı bolǵanyn aıtty. «Aıqyn» gazetinde bizdiń aıaq kıim týraly maqala shyqty. Prezıdent baspasóz qyzmetiniń jetekshisi Berik Ýálı Qasym-Jomart Toqaevtyń osy maqalany oqyp, jas kásipkerlerdiń osyndaı aýyr óndirispen aınalysqanyna qýanyp, aıaq kıim satyp alǵysy keletinin aıtty. Oǵan gazettegi sýret unaǵan» deıdi kásipker.
Keıinirek kásipker WhatsApp messendjerimen baspasóz qyzmetiniń jetekshisine aıaq kıimderdiń modelderin jibergen. Prezıdent aıaq kıimniń qońyr túsin tańdapty.
«Týflıdi «Qazposhta»-men jiberdik jáne ol tólep aldy. Baǵasy 21 myń teńge, al aıaq kıim ólshemi – 43. Ol qońyr tústi lofer aldy. Bizdiń aıaq kıimder taza bylǵarydan» dep atap ótti Dáýren Rahmanqul.
Prezıdent apparatynan tórt jup aıaq kıimge tapsyrys berilgen eken. Bir juby Qasym-Jomart Toqaevqa, ekinshisin Berik Ýálıge jáne taǵy ekeýin eki qyzmetker bergen. Sonymen qatar Prezıdent Ákimshiliginde isteıtin áıelder aıaq kıimderge qyzyǵyp, ózderine tapsyrys bermekshi bolǵan eken.
Alaıda, fabrıka áıelder aıaq kıimin tikpeıtin kórinedi.
Eske sala ketsek, búgin Qasym-Jomart Toqaev Twitter jelisindegi paraqshasynda qazaqstandyq kásipkerden aıaq kıim satyp alǵanyn jazǵan bolatyn.
«Aıqyn» qarapaıym eńbek adamdaryn únemi nasıhattaıdy. Jaqynda etik tigetin jas kásipker týraly jaqsy suhbat jarııalandy. Otandyq ónimdi qoldaý maqsatynda men de bir aıaq kıimin satyp aldym. Adal eńbek etip, naqty kásippen aınalysýǵa degen kózqaras ornyǵýy tıis» dep jazdy Qasym-Jomart Toqaev.