Halyqtyń kóshi-qonyna oraı 3,9 mlrd teńge somasynda jáne dıagnoz ben emdeý júıesiniń ózgerýine baılanysty 4,3 mlrd teńge turatyn dári-dármekten bas tartýǵa týra keldi. Bul týraly Densaýlyq saqtaý mınıstrliginiń alqa otyrysynda «SQ-Farmasııa» basqarma tóraǵasynyń mindetin atqarýshy Berik Shárip málimdedi.
Ol, sondaı-aq 2018 jyldyń qorytyndysy boıynsha, ambýlatorlyq dári-dármekpen qamtamasyz etý aıasynda medısınalyq uıymdarǵa Biryńǵaı dıstrıbıýter tarapynan 95 mlrd teńge somaǵa dári-dármek jiberilgenin, 87,2 mlrd teńgege reseptilermen qamtamasyz etilgenin aıtty. Medısınalyq uıymdardan bastapqy ótinimder boıynsha satyp alý 117,5 mlrd teńgege júzege asyrylǵan. 2018 jyly stasıonarlarǵa 74,3 mlrd teńge somaǵa dári-dármek jóneltilgen.
2019 jyly tegin qamtamasyz etý úshin satyp alynatyn dári-dármek tizimi 2018 jylmen salystyrǵanda 108 ataýǵa artqan. 2019 jylǵa satyp alý 178,7 mlrd teńgeni qurady, onyń ishinde: dıspanserlik esepte turǵan naýqastar úshin – 91,1 mlrd teńge, stasıonarlar úshin – 87,6 mlrd teńge. Qazirgi ýaqytta resept boıynsha dári-dármekter tek 46,5 mlrd teńgege berilgenine qaramastan, qazirdiń ózinde, stasıonarlarǵa 55,4 mlrd teńge, al ambýlatorlyq dári-dármekpen qamtamasyz etý úshin 66,2 mlrd teńge somasynda dári-dármek jóneltilgen. Osylaısha, búginde medısınalyq uıymdardyń qoımalarynda 19,7 mlrd teńge somaǵa preparattar qory bar.
Berik Shárip atap ótkendeı, Biryńǵaı dıstrıbıýter tiziminde shekti baǵanyń 40%-ǵa tómendeýin eskere otyryp, 2019 jylǵa satyp alý kezinde 22,1 mlrd teńge únemdelgen. Ol eń shyǵyny kóp aýrýlardy da atap ótti. Máselen, qant dıabetin emdeýge arnalǵan dári-dármekke 17 mlrd teńge jumsalǵan, gemofılııasy bar emdelýshilerge 8,1 mlrd teńge somasynda dári-dármek satyp alynǵan. Onkologııalyq aýrýlardy emdeýge arnalǵan preparattarǵa 7,8 mlrd teńge, arterııalyq gıpertenzııany emdeýge 5,8 mlrd teńge, gematologııalyq aýrýlardy emdeýge 4 mlrd teńge jumsaldy. Bul rette, tegin qamtamasyz etiletin naýqastardyń eń kóp sany (47%) arterııalyq gıpertonııamen aýyrady, 17% – qant dıabeti jáne eldegi dıspanserlik pasıentterdiń jalpy sanynyń 15%-y júrektiń ıshemııalyq aýrýy boıynsha esepte tur.
Sondaı-aq «SQ-Farmasııa» basshysy birinshi jartyjyldyqtaǵy 1439 qysqa nómiri boıynsha tegin dári-dármekpen qamtamasyz etý máseleleri jónindegi baılanys ortalyǵynyń jumysyn qorytyndylady. Osy ýaqyt ishinde 28 064 qońyraý kelip tústi, onyń ishinde 6191 qońyraý (22%) shaǵymdardy qurady. Barlyq negizdelgen shaǵymdar pysyqtalyp, emdelýshiler ózderine tıesili dári-dármekti aldy.