Parlament Senaty depýtattarynyń aımaqtarda halyqpen kezdesýleri aıasynda el ishindegi eń ózekti máseleler talqylanyp jatyr. Senatorlar atalǵan júzdesýlerde Elbasynyń joldaýlary men Memleket basshysynyń alǵa qoıǵan tapsyrmalarynan týyndaıtyn mańyzdy mindetterdi iske asyrýǵa baılanysty túsindirý jumystaryn júrgizip, Senattyń zań shyǵarý qyzmeti, sońǵy sessııada qabyldanǵan zańdar týraly kópshilikti habardar etip keledi.
Depýtattar jurtshylyqpen kezdesý barysynda aımaqtardaǵy kóptegen túıtkilmen jan-jaqty tanysyp, ony jergilikti atqarýshy organdar ókilderimen birlesip sheshýdiń joldaryn izdestirýge atsalysýda. Senator Sársenbaı Eńsegenov Atyraý oblysyna sapary barysynda jergilikti turǵyndardyń ótinishi boıynsha Jaıyq ózeniniń jaǵdaıymen jiti tanysý úshin qaıyqqa minip, aıdyn ahýalyn kórip qaıtty.
– Inderbor kentiniń tusynda burynǵy ótkel bermes Jaıyq ózeniniń ortasynda búginde ájeptáýir aral paıda bolǵan. Sýdyń azaıýynan ózenniń keı jeri 50 santımetrge deıin taıyzdap ketken. Qaıyqtar sýdan qaıyrlap áreń shyǵady. Bul qaýipti jaǵdaı ekeni túsinikti. Elimizdiń batys ólkesindegi eń iri ózen sýynyń azaıyp ketýine baılanysty Úkimet tıisti deńgeıde nazar aýdaryp, baqylaýǵa alyp, naqty shara qabyldamasa, sońy úlken ekologııalyq zardapqa soqtyrýy múmkin, – dep Sársenbaı Eńsegenov tabıǵattaǵy eleýli ózgeristerge alańdaýshylyǵyn bildirdi.
Senatordyń Inder aýdanyndaǵy Bódene aýylynda jergilikti turǵyndarmen kezdesýinde Jaıyq ózeni sýynyń jyldan-jylǵa azaıyp bara jatqany, orman-toǵaıdyń jaǵdaıy nasharlaǵany, shabyndyq, mal azyǵy jetispeıtini, mal urlyǵy toqtamaı turǵany da sóz boldy.
* * *
Parlament Senatynyń depýtaty Ǵumar Dúısembaev Atyraý oblysyna sapary aıasynda oblystyq ishki ister departamentinde bolyp, polısııa qyzmetkerlerimen kezdesti. Senator sondaı-aq Mahambet jáne Inder aýdandarynda boldy, Aqtoǵaı jáne Eltaı aýyldyq okrýgterinde jergilikti turǵyndarmen, máslıhat depýtattarymen júzdesti. Senator eldi mekenderdegi áleýmettik nysandardy aralady, salynyp jatqan qurylys nysandarynyń jumystarymen tanysty.
Jergilikti basshylar senatorǵa aýyldyń áleýmettik-ekonomıkalyq damý barysy týraly habardar etip, qolǵa alynǵan mańyzdy sharalardy tanystyrdy. Jergilikti bıýdjetti ıgerý, aýyldaǵy kásipkerlikti, sharýa qojalyqtaryn damytý, jurtshylyqtyń qarjy saýatyn arttyrý jaıy týraly áńgime óristedi.
* * *
Senat depýtaty Sergeı Plotnıkov Shyǵys Qazaqstan oblysyna jumys sapary barysynda Qazaqstan – Amerıka erkin ýnıversıtetiniń jataqhanasynda boldy. Joǵary oqý orny ǵımarattarynyń biri taıaýda qaıta jańartylyp, stýdentterge arnalǵan 88 oryndyq jataqhanaǵa aınalǵan.
Senator stýdentter turatyn yńǵaıly oqý, demalys, tamaq daıyndaý bólmeleri men turmysqa qajetti arnaýly bólmelerdiń jaǵdaıymen tanysty.
* * *
Senat depýtaty Serik Bekturǵanov Qostanaı oblysyndaǵy balalardyń jazǵy demalysyn uıymdastyrý barysymen tanysty. Sonymen qatar Ishki ister mınıstrliginiń Sh.Qabylbaev atyndaǵy Qostanaı akademııasynyń qala syrtyndaǵy lagerine bardy. Depýtat balalardyń qala syrtyndaǵy demalys aımaǵynda bolý baǵdarlamasymen tanysty jáne akademııa basshylyǵymen qıyn jasóspirimderge arnalǵan lager uıymdastyrý bastamasy týraly jan-jaqty áńgimelesti. Balalar qala syrtynda alǵash ret demalǵandaryn aıtyp, aldaǵy jyldary da demalysty osylaı uıymdastyrý týraly ótinish jasady.
* * *
Parlament Senatynyń depýtattary Nurjan Nursıpatov pen Manap Kóbenov Pavlodar oblysyna jumys sapary barysynda polısııa departamentinde boldy. Senatorlar polısııa bólimshesiniń qyzmetimen tanysyp, patrýldik polısııadaǵy, kóshi-qon qyzmetindegi, ákimshilik polısııadaǵy jańalyqtardan habardar boldy.
Senat depýtattary oblystyq UQK departamenti men oblystyq sotqa da bas suqty. Sonymen qatar Qaraoba aýyldyq okrýgindegi Áýelbek aýylynda salynyp jatqan sý qubyrynyń qurylysymen tanysyp, kásiporyn basshysymen óndiris máselelerin talqylady. Depýtattar Aqtoǵaı aýyldyq okrýginiń Harkovka, Prırechenskoe selolarynyń aýmaǵynda bolyp, sharýa qojalyqtarynyń basshylarymen kezdesti jáne egistiktiń jaı-kúıin qarap, sharýashylyqtardy damytýdyń aldaǵy josparlary týraly áńgimelesti.
* * *
Parlament Senatynyń depýtattary Nurlan Beknazarov pen Aıgúl Qapbarova jumys babyndaǵy sapar aıasynda Shymkent qalasynda jergilikti turǵyndarmen kezdesti. Senatorlar shymkenttik jastarmen pikir almasyp, sessııa kezinde qabyldanǵan zańdar týraly jan-jaqty habardar etti. Jastar zańdardyń talqylaný barysy týraly málimetter alyp, ózderin qyzyqtyrǵan suraqtarǵa jaýap estidi.
Senatorlar sonymen qatar Shymkent qalasynyń máslıhat depýtattarymen kezdesti. Jıynda senatorlar Senattyń osy ýaqytqa deıin atqarǵan jumystary jáne qabyldanǵan zańdardyń mańyzy týraly málimet berdi.
* * *
Parlament Senatynyń depýtattary Rashıt Ákimov pen Dáýren Ádilbekov Aqmola oblysyndaǵy jumys babyndaǵy sapary barysynda Ereımentaý aýdanynyń Novomarkovka aýylynda bolyp, «Jańa Bereke» seriktestiginiń mal bordaqylaý alańynyń jumysymen tanysty.
Senatorlar Aqsýat aýylyndaǵy «Aizet Farms» seriktestigine, Arshaly aýdanyndaǵy Mıhaılov aýyldyq okrýgine baryp, aýyl sharýashylyǵy taýaryn óndirýshilermen kezdesti.