Qostanaı oblystyq polısııa departamentinde tájirıbeli mamandardan qurylǵan jedel top kıikti zańsyz atqan eki azamatty eki saǵattyń ishinde taýyp, Naýyrzym aýdanyndaǵy Aqjol aýylynyń mańynan ustady. Olar atqan kıiktiń óleksesin laqtyryp tastap, ózderi sytylyp ketkisi kelgen.
Oqıǵa týraly dabyl túsisimen Naýyrzym aýdandyq polısııa bóliminen jedel-izdestirý toby quryldy, oǵan Oblystyq polısııa departamentinen jedeldetilgen top qosyldy. Kıik atqan qaskóılerdi jan-jaqtan torýyldap, tipti shekara mańyndaǵy aýdandarǵa da arnaıy qurama top baǵyttaldy. Brakonerler uzaı almapty, olardy oqıǵa bolǵan jerden 30 shaqyrym jerde «VAZ 2121» markaly mashınamen qashyp bara jatqanda quryqtady.
Qostanaı qalasynda turatyn 35 jastaǵy azamat Naýyrzym aýdanynyń Razdolnoe selosyndaǵy týysynyń úıine qonaqqa barady da, ekeýi dalany kezip, eki kıikti atyp alady. Onyń bireýin mashınanyń bagajyna salyp alady. Biraq taǵy bir shaqyrym júrgennen keıin brakonerdiń bireýi ózderiniń kózge túsip qalǵanyn sezedi de, qoryqqanynan mashınadaǵy kıikti de laqtyryp, О́leńdi aýylyna qaraı zyta jóneledi. Olardyń aram pıǵyly iske aspady, polıseıler quryǵynan qashyp qutyla almady.
Qazir kıik atqan kúdiktilerdiń ústinen QR QK 337-baby boıynsha sotqa deıingi tergeý amaldary júrip jatyr.
Qostanaı